«Կարծում եմ, մեր դիվանագիտական ներկայացուցչությունները պետք է լինեին ավելի ակտիվ»,- խորհրդարանում լրագրողների հետ զրույցում այսօր ասաց ՀՀ-ԵՄ միջգերատեսչական աշխատանքային խմբի անդամ Նաիրա Զոհրաբյանը`անդրադառնալով ՀՀ-ԵՄ շրջանակային համաձայնագրի վավերացման մասին հարցին։ Նա կիսում է ընդդիմության այն քննադատությունները, որ վավերացման գործընթացը դանդաղել է: Մայիսին Եվրոպական խորհրդարանի ընտրություններ են նախատեսված: Նաիրա Զոհրաբյանը չի կարծում, որ այս իրավիճակում 10-ից ավել երկրները, որոնք չեն վավերացրել համաձայնագիրը, «իրենց խորհրդարանական ընտրությունները թողած` մտածեն ՀՀ-ԵՄ համաձայնագրի մասին»:
Նա կարծում է, որ մեր դիվանագիտական ներկայացուցչությունների աշխատակիցներն էլ ավելի ակտիվ պետք է լինեն, քանի որ այժմ արդեն գոնե տարատեսակ գործարարներ չեն ներկայացնում այդ ինստիտուտներն, այլ պրոֆեսիոնալ դիվանագետներ:
Որպես ՀՀ-ԵՄ ստեղծված միջգերատեսչական աշխատանքային խմբի անդամ, նա ասաց, որ բավականին հանգամանալից քննարկում են ճանապարհային քարտեզը, որը պետք է հաստատվի առաջիկայում. «Պիտի ասեմ, որ, ըստ էության, աշխատանքները, ճանապարհային քարտեզի հետ կապված, կարելի է համարել ավարտված»:
Aravot.am-ի հարցին`ինչո՞ւ վարչապետի Բրյուսել կատարած այցի օրակարգում չկան ՀՀ-ԵՄ համաձայնագրի վավերացմանը կամ ճանապարհային քարտեզին վերաբերվող հարցեր, Նաիրա Զոհրաբյանը պատասխանեց, որ հարցը պետք է ուղղել վարչապետի մամուլի խոսնակին. «Ես վարչապետի մամուլի խոսնակը չեմ»:
Այլ մանրամասները` տեսանյութում
Նելլի ԳՐԻԳՈՐՅԱՆ
