«Իմ քայլը» խմբակցության պատգամավոր Արեն Մկրտչյանն այսօրվա ԱԺ նիստում պատասխանեց ԲՀԿ պատգամավոր Գեւորգ Պետրոսյանի մեղադրանքներին, թե ինքը Պետրոսյանի մշակած օրենքի նախագծի քննարկման ժամանակ իրեն ճիշտ չի պահել, ապա ԶԼՄ-ների հետ զրույցում ապատեղեկատվություն է տարածել նախագծի մասին:
«Այդ նախագիծը հնարավորություն էր ստեղծում մեկ առանձին գործարարի՝ տոտալ հսկողություն սահմանել իր ենթակայության բիզնեսների հանդեպ»,-«Արհմիությունների մասին օրենքում փոփոխություններ կատարելու մասին» օրենքի նախագծի վերաբերյալ իր կարծիքը կրկնեց Արեն Մկրտչյանը, ապա օրինակ բերեց. «Խաղատունը, կոնյակի կամ ցեմենտի գործարանը կարող են ստեղծել արհեստակցական միություն: Եթե հրաշքով պարզվի, որ այդ երեք ձեռնարկությունները տնօրինում է մեկ սեփականատեր, ռիսկ է կուտակվում քաղաքացիներին տոտալ հսկողության ներքո դնելու՝ արհեստակցական միության միջոցով»:
Ապա Արեն Մկրտչյանը նշեց, որ ԱԺ համապատասխան հանձնաժողովում նախագծի քննարկման ժամանակ Գեւորգ Պետրոսյանը 88 հոգանոց խմբակցությանը՝ «Իմ քայլին», անվանել է «դակիչ». «Ես ձեզ կոռեկտության կոչ եմ անում, այլապես ստիպված կլինենք ձեր հետ կոռեկտության դասընթաց անցկացնել եւ վերջում բանավոր-գրավոր քննություններ հանձնել»:
Պատգամավորների հեռակա բանավեճին արձագանքեց ԱԺ նախագահ Արարատ Միրզոյանը:
«Կրքոտ քննարկումների առիթներ դեռ կունենանք: Առաջարկում եմ կրքերը դրսեւորել այն ժամանակ, երբ դրանց առիթը կա: Թույլ տամ ինձ նման հորդոր ուղղել բոլոր պատգամավորներին»,-եզրափակեց նա:
Լուիզա ՍՈՒՔԻԱՍՅԱՆ
