ԱԺ հերթական նստաշրջանի այսօրվա նիստում պատգամավորների քվեարկությամբ (37 «կողմ» եւ 67 «դեմ») մերժվեց «ՀՀ քրեական օրենսգրքում լրացումներ եւ փոփոխություններ կատարելու մասին» օրենքի նախագիծն ԱԺ օրակարգ ներառելու հարցը: Այս նախագծի հեղինակը ԲՀԿ պատգամավոր Նաիրա Զոհրաբյանն է: Նախագծով առաջարկվում էր նախնական կալանքի 1 օրը հաշվարկել որպես 1,5 օր՝ հաշվի առնելով նախնական կալանքի ներքո գտնվողների պահման պայմանները:
Նաիրա Զոհրաբյանը հայտարարեց. «Նախնական կալանքի պահման 7 հոգանոց խցում քնում են 24 հոգով: Այդ վայրերն աղետ են ՀՀ-ի համար: Խորհրդարանական մեծամասնությանը եւ կառավարությանը կոչ եմ անում չկրկնել նախորդ մեծամասնության եւ կառավարության սխալները: Ի՞նչն է փոխվել մեր քաղաքական դաշտում, երբ ընդդիմության մի քանի օրինագիծ արդեն կառավարության բացասական եզրակացությանն է արժանացել»:
«Իմ քայլը» խմբակցության պատգամավոր Մխիթար Հայրապետյանն էլ դառնալով Նաիրա Զոհրաբյանի ասածներին՝ կոչ արեց նախկին իշխանություններին չվկայակոչել եւ կասկածի տակ չդնել «Իմ քայլը» խմբակցության պատգամավորների անկախությունն ու սեփական կարծիք ունենալու փաստը:
Նաիրա Զոհրաբյանն էլ իր հերթին հակադարձեց Մխիթար Հայրապետյանին՝ ասելով, որ ամենեւին նկատի չի ունեցել, թե խորհրդարանական ներկայիս մեծամասնությունը նախորդ իշխանության պատճենն է. «Նախորդը «կնոպկայի» պես էր եւ քվեարկում էր այնպես, ինչպես կթելադրեր կառավարությունը: Մեր ասածն այն էր, որ պետք է հնարավորություն տալ ԱԺ-ում քննարկել ներկայացված նախագծերը»:
Լուիզա ՍՈՒՔԻԱՍՅԱՆ
