ԱԺ հերթական նստաշրջանի աշխատանքների մեկնարկին այսօր «Լուսավոր Հայաստան» խմբակցության պատգամավոր Արման Բաբաջանյանն ԱԺ նախագահ Արարատ Միրզոյանի ուշադրությունը հրավիրեց այն փաստի վրա, որ ԱԺ-ի առաջ բողոքի ցույց են անում «Աջ ղեկ» նախաձեռնության անդամները՝ ակնկալիքով, որ աջ ղեկով մեքենաների ներկրման հարցն ԱԺ-ն հրատապության կարգով կքննարկի:
Հիշեցնենք՝ Կառավարությունը հավանություն է տվել նախագծին, համաձայն որի՝ մինչև 2018թ. դեկտեմբերի 30-ը գնված աջ ղեկով ավտոմեքենաները կարելի է ՀՀ բերել մինչև այս տարվա մայիսի 1-ը: «Աջ ղեկի» անդամները մտավախություն ունեն, որ ԱԺ-ն չի հասցնի քննարկել եւ ընդունել այդ նախագիծը:
Արարատ Միրզոյանը պատգամավորի բարձրաձայնած խնդրին այսպես արձագանքեց. «Ի՞նչ կարող ենք անել՝ հետեւել օրենքով սահմանված ընթացակարգերին: Օրենքի նախագիծը շրջանառության հերթական փուլում է, որի ավարտից հետո կսկսվի հաջորդ փուլը եւ կհայտնվի մեր քննարկման ներքո: Իհարկե, մենք այս հարցը կարեւորում ենք, ինչպես եւ մյուս նախագծերը»:
Լուիզա ՍՈՒՔԻԱՍՅԱՆ
