Սոցիոլոգ Գևորգ Պողոսյանի խոսքերով, եթե կառավարությունը գտնում է, որ մարզպետարանների աշխատակազմն ուռճացված է, ապա կրճատումը տրամաբանական է, բայց միանգամից կրճատումը կարող է դժգոհությունների մեծ ալիք բարձրացնել։
«Նոր գործազրկություն մենք չպետք է ստեղծենք։ Դա միանշանակ է, բայց այլ խնդիր է, որ ուռճացված ապարատը կրճատման կարիք ունի։ Կրճատումներով պետք է բերել ինչ-որ բալանսի։ Բյուջեի համար անիմաստ բեռ է այդքան ավելորդ մարդ պահելը։ Դրա համար, հավանաբար, պետք է կրճատումներն անել աստիճանաբար։ Եթե այսօր միանգամից այդքան մարդ կրճատենք, ապա մի քանի ամիս հետո կտեսնենք դրա հետևանքը։ Դա դժգոհության մեծ ալիք կբարձրացնի»,- ասաց Պողոսյանը՝ հավելելով, որ խնդիրը երկու կողմ ունի՝ մեկը մարդկայինն է, որ չի կարելի այդքան մարդու փողոցում թողնել առանց աշխատանք, և մյուս կողմից՝ այդքան մարդու պահել պետական համակարգում՝ բյուջեի հաշվին և վճարել ոչինչ չանելու դիմաց։ «Պետական համակարգերը տարիների ընթացքում ուռճացվում են, և ժամանակ առ ժամանակ պետք է կրճատումներ անել, պարզապես միանգամից այդ խնդիրը չեն լուծում։ Միանգամից մեծաքանակ կրճատումները բերում հանգեցնում են բախման, սոցիալական դժգոհության։ Ցանկացած օպտիմալացում պետք է անել սահուն ձևով, ոչ թե մեկ ամսում, այլ, ասենք, երկու տարվա ընթացքում աստիճանաբար կրճատելով բերել մի տրամաբանական մակարդակի։ Ժամանակի մեջ կարելի է լուծել նաև աստիճանաբար կրճատվածների սոցիալական խնդիրները, ապահովել այլ աշխատանքով։ Այն, ինչ արվել է 10-20 տարում, դա մեկ ամսում լուծելը սխալ է։ Գոնե 1-2 տարվա մեջ պետք է լուծել, որ հնարավոր լինի զերծ մնալ ցնցումներից»,- եզրափակեց Գևորգ Պողոսյանը։
Սոնա Հարությունյան
Հոդվածն ամբողջությամբ՝ «Ժամանակ» օրաթերթի այսօրվա համարում:
