«Համաձայն ենք, որ ցանկացած եզրակացություն, որը կձեւավորվի որպես ԱԺ պատգամավորների կարծիք, դիտարկվի որպես հիմք՝ հետագայում ԵՏՄ մեր գործընկերների հետ բանակցելու համար: Խոսքը միայն ավտոմեքենաների մասին չէ, այլ նաեւ մի շարք այլ ապրանքատեսակների»,-լրագրողների հետ ճեպազրույցում այսօր անդրադառնալով ԵՏՄ կանոնակարգով սահմանված՝ երրորդ երկրներից ՀՀ ներկրվելիք ավտոմեքենաների մաքսատուրքերի բարձրացմանը, ասաց ՀՀ տնտեսական զարգացման եւ ներդրումների նախարար Տիգրան Խաչատրյանը:
Նրա խոսքով՝ կառավարությունն էլ իր հերթին է այս հարցում նախաձեռնողական, եթե անհրաժեշտ է գտնում. «Ավտոմեքենաների վերաբերյալ կառավարության եզրակացություն այս պահին չկա, այն քննարկումների արդյունքում է ձեւավորվում»: Նախարարը չբացառեց, որ գուցե քննարկեն ԵՏՄ կանոնակարգերին հարմարվելու ժամանակահատվածը եւս երկու տարով երկարացնելու հարցով կառույցին դիմելու հնարավորությունը:
Ինչ վերաբերում է Իրան-ԵՏՄ ազատ առեւտրի համաձայնագրին, որը հիմա վավերացման փուլում է, Տիգրան Խաչատրյանը նշեց՝ այն մեծ հնարավորություն է ԵՏՄ կազմակերպությունների, այդ թվում՝ հայաստանյան ընկերությունների համար, որպեսզի վերջիններս դեպի իրանական շուկա ավելի պարզեցված մուտք ունենան. «Դա հնարավորություն է նաեւ իրանական արտադրողների համար՝ հայաստանյան, ռուսական, բելառուսական շուկաներ մտնելու տեսանկյունից: Այդ շուկաներն Իրանի համար երկրորդական չեն: Իրանի դեմ պատժամիջոցները ժամանակավոր են, իսկ համաձայնագիրը՝ երկարաժամկետ»:
Խաչատրյանը հավելեց, որ ըստ համաձայնագրի՝ Իրան ներկրվելիք մոտ 300 ապրանքների մաքսատուրքեր կնվազեցվեն կամ կզրոյացվեն. «ՀՀ-ն առաջիկա ամիսներին կվավերացնի այդ համաձայնագիրը»:
Լուիզա ՍՈՒՔԻԱՍՅԱՆ
