Կան դեպքեր, երեւույթներ…, հիմնականում քաղաքական դաշտում, որոնք մեկնաբանությունների կարիք չունեն, բացահայտ են, տեսանելի ու հասկանալի: Օրինակ՝ նախօրեին Ղազախստանում ոստիկանները ձերբակալել են ակտիվիստներին, Վենեսուելա-Կոլոմբիա սահմանը դեռ փակ է մնում, Հնդկաստանի վարչապետը միասնականության կոչով է հանդես եկել կամ օրեր առաջ ԱՄՆ նախագահ Թրամփը լքել է Վիետնամը՝ Հյուսիսային Կորեայի առաջնորդ Կիմ Չեն Ընի հետ ունեցած երկրորդ հանդիպումից հետո եւ այլն: Սա միջազգային լրահոսից: Անդրադառնալով մեր իրականությանը, փաստենք, որ մշակութային ոլորտում էլ կատարվում են իրադարձություններ, որոնք խոսում են իրենց մասին եւ չեն մեկնաբանվում: Այս դեպքում՝ Հայաստանում որոշ երկրների դեսպաններ «շտապում» են բազմադարյա մշակույթ ունեցող Հայաստանի մշակութային բուհերից Կոմիտասի անվան պետական կոնսերվատորիա: Գուցե հիմնական պատճառը Կոմիտասի հոբելյա՞նն է, Վարդապետի ծննդյան 150-ամյակը…
Օրերս կոնսերվատորիայի ռեկտորի պաշտոնակատար Սոնա Հովհաննիսյանը հյուրընկալել է Հայաստանի Հանրապետությունում Վրաստանի Հանրապետության արտակարգ եւ լիազոր դեսպան Ն. Գ. Գիորգի Սագանելիձեին: Վստահ ենք, որ հանդիպման ընթացքում քննարկվել են երկու երկրների միջեւ կրթական եւ մշակութային համագործակցության առաջիկա զարգացման ուղիները:
Հայաստանում Ճապոնիայի արտակարգ եւ լիազոր դեսպան Ն. Գ. պարոն Ջուն Յամադայի հետ էլ նույն ձեւաչափով է անցել հանդիպումը, բայց այս անգամ բարձրաստիճան պաշտոնյայի համար մատուցվել է անակնկալ. հնչել են հայ եւ ճապոնացի կոմպոզիտորների ստեղծագործություններ, որոնց կատարմամբ հանդես են եկել դաշնակահար, կոմպոզիտոր, կոնսերվատորիայի ստեղծագործական ամբիոնի վարիչ Արթուր Ավանեսովը, ֆլեյտահար, կոմպոզիտոր, կոնսերվատորիայի ուսումնական գծով պրոռեկտոր Արամ Հովհաննիսյանը, դաշնակահար, պրոֆեսոր Անահիտ Ներսիսյանը: Կոմիտասյան կատարումներով հանդես է եկել Սոնա Հովհաննիսյանի ղեկավարած «Հովեր» պետական կամերային երգչախումբը:
Տեղեկացված ենք նաեւ, որ կոնսերվատորիայի ռեկտորը հյուրընկալել է նաեւ Երեւանում Ռուսաստանի մշակույթի եւ գիտության կենտրոնի մշակութային եւ հասարակական բաժնի ղեկավար Անդրանիկ Արզումանյանին եւ կրթության ու ռուսաց լեզվի բաժնի ղեկավար Օլգա Լիկովային: Վերջիններս կոնսերվատորիայի գրադարանին են նվիրել մասնագիտական գրականություն: Մեկ կարեւոր տեղեկություն եւս. հանդիպման ընթացքում քննարկվել են մարտին կայանալիք ռուս երաժշտության առաջին միջազգային դաշնամուրային մրցույթի անցկացման եւ կազմակերպման հարցերը, ինչպես նաեւ հետագա համագործակցության համատեղ նախագծերի իրականացման հեռանկարները:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ,
02.03.2019
