«Նման այցերը կարեւոր են ՀՀ-ի համար, բայց այնպես չէ, որ Իրանի համար ամեն ինչ հասկանալի է: Շատ դեպքերում մեզ էլ հասկանալի չէ Իրանի պահվածքը: Տարիների ընթացքում ավելի շատ եղել է ոչ թե գործ, այլ խոսք»,-«Միջազգային եւ անվտանգության հարցերի հայկական ինստիտուտ»-ում այսօր Նիկոլ Փաշինյանի՝ Իրան կատարած այցի մասին քննարկման ժամանակ հայտարարեց քաղաքագետ Ստյոպա Սաֆարյանը:
Նրա գնահատմամբ՝ 2018 թ.-ին ՀՀ-ում տեղի ունեցած քաղաքական փոփոխություններն Իրանի ղեկավարության շրջանում անորոշությունների տեղիք են տվել. «Նրանք փորձում են մեր հեղափոխությունը նմանեցնել իրենց հեղափոխությանը, երբ դաշնակիցներ են փոխվում: Որքան էլ Փաշինյանն ու Ռոհանին ժպտան հեռուստաէկրաններին, անորոշությունները դեռ որոշ ժամանակ պահպանվելու են»:
Ըստ Ստյոպա Սաֆարյանի, ՀՀ-ԱՄՆ փոխայցերը եւս սրելու են Իրանի անորոշությունը, քանի որ ԱՄՆ-ի հետ, ինչպես հայտնի է, այդ երկիրը թշնամական հարաբերություններ ունի. «Զուգահեռներ տանելն անխուսափելի է, բայց տարածաշրջանում ՀՀ-ն չի անտեսել Իրանին, նա էլ անկեղծ է անվտանգության շուրջ հայտարարություններում: ՀՀ-ն տարածաշրջանում փխրուն խաղաղության պահպանման գործոն է, ինչը շատ կարեւոր է Իրանի համար»:
Լուիզա ՍՈՒՔԻԱՍՅԱՆ
