«Հայ ազգային կոնգրեսի» անդամ Արամ Մանուկյանն այսօր Մարտի 1-ի երթին մասնակցելիս, Factor.am-ի հետ զրույցում ասաց, որ շնորհակալ է ժողովրդին՝ Մարտի 1-ի զոհերի հիշատակին կազմակերպված երթին մասնակցելու համար: Նրա խոսքով, այս հարցը ՀՔԾ-ում, ոստիկանությունում եւ Կառավարությունում չէ, որ պետք է լուծվի.
«Այս հարցը պետք է լուծվի ժողովրդի մասնակցությամբ եւ այս հետեւողականությամբ, որովհետեւ եթե այսօրվա երթին մասնակցող քաղաքացիների բազմամարդությունը չլինի, եթե ժողովրդի այս տրամադրվածությունը չլինի, Ռոբերտ Քոչարյանի գողացած փողերն աշխատելու են, եթե այս տրամադրվածությունը չլինի, այդ լրատվամիջոցներն ու առնված փաստաբաններն իրենց սեւ գործը շարունակելու են եւ Մարտի 1-ի գործի բացահայտմանը կարելի է հասնել համաժողովրդական ճնշման եւ աջակցության արդյունքում։ Աջակցություն է պետք այն քննիչներին, որոնք այս գործը տանում են»:
Արամ Մանուկյանի խոսքով, Մարտի 1-ի գործը սովորական հանցագործություն չէ:
«Մեր ժողովրդի արժանապատվությանը կպել են, մեր ժողովուրդը պետք է ստիպի այս իշխանություններին, քննիչներին, մաքրել այդ խարանը։ Այսօրվա իշխանության կամքն ու ներողությունը զոհերի հարազատներից, այդ ճանապարհն է։ Մենք գոհ ենք այս իրավիճակից, որովհետեւ սա շանս է տալիս բացահայտել Մարտի 1-ը»:
Լուսինե ԲՈՒԴԱՂՅԱՆ
