Այսօր Հայ ազգային կոնգրեսի (ՀԱԿ) ներկայացուցիչները ներկա գտնվեցին մարտի 1-ի զոհերի հիշատակին նվիրված Սուրբ Սարգիս եկեղեցում մատուցված պատարագին:
«Դա հանցագործություն էր ժողովրդավարության դեմ էր, դա հանցագործություն էր ժողովրդի ինքնիշխանության դեմ: Մարտի 1-ի էջը կարող է փակել միայն ժողովուրդը, այն էլ միայն այն դեպքում, եթե արդարադատություն լինի: Ուրիշ ձև մարտի 1-ի էջը փակելու չկա: Դրանից հետո կարող է լինել և իրավունքների վերականգնում, և հաշտություն. ամեն ինչ էլ հնարավոր է, բայց արդարադատությունը պետք է գա առաջինը», -Aravot. am-ի հետ զրույցում ասաց ՀԱԿ փոխնախագահ Լևոն Զուրաբյանը:
Վերջինս կարևորեց այն, որ այլևս կոծկման գործընթաց չկա, հակառակը՝ ըստ պարոն Զուրաբյանի, տեսնում ենք, որ իրավապահ մարմինները փորձում են փութաջանորեն գործը բացահայտել:
«Մինչև մենք դատավարության ընթացքում չտեսնենք՝ ուր են հասել, ինչ փաստեր են ես ամբողջական գնահատական տալ չեմ կարող, բայց ընդհանուր մթնոլորտը նպաստավոր է, և երևում է՝ իրավապահ մարմինը զբաղվում է բացահայտմամբ»,- հավելեց մեր զրուցակիցը:
Խոսելով հիմա էլ նախկին իշխանությունների այն հայտարարությունների մասին, թե մարտի մեկի բացահայտման գործընթացը միակողմանի է ընթանում՝ պարոն Զուրաբյանն ասաց. «Ընդհանրապես դահիճները միշտ կարծում են, որ ամեն ինչ միակողմանի է, իրենք ուզում են և դահիճ լինել, և դահիճին ու զոհին դնել նույն հարթության վրա: Այդպես չի լինում, հանցագործը պետք է պատժվի»:
Մարտի 1-ի դեպքերի ժամանակ զոհված Գոռ Քլոյանի հայրը՝ Սարգիս Քլոյանը, պատասխանելով մեր այն հարցին, թե հայտարարել էր, որ մարտի 1-ը կբացահայտվի միայն այն ժամանակ, երբ լինի իշխանափոխություն, հիմա երբ եղել է իշխանափոխություն, ինչպե՞ս է գնահատում քայլերը՝ ուղղված մարտի 1-ի բացահայտմանը, ասաց. «Ոնց ասել եմ, այնպես էլ իմ ասածը իրականություն է դարձել: Իշխանափոխություն է եղել, գործերը շատ լավ ընթանում են: Արդեն բուրգի վերևի մասը հայտնվել է ճաղերի ետևում, այդ մի խմբին ուղարկենք դատարան, անցնեք մյուս խմբին: Կատարվող քայլերը բավարար եմ գնահատում»:
Պարոն Քլոյանի կարծիքով՝ Լևոն Տեր-Պետրոսյանը պետք է ճանաչվի որպես տուժող. «մարդը Ազատության հրապարակում իր մեքենայի մեջ նստած է եղել, ցուցարարներին ջարդել են, ծեծել են, ձերբակալել են, Լևոն Տեր-Պետրոսյանին էլ շղթայել են, ուղարկել են տնային կալանքի: Ճիշտ է, նրան արդեն հարցաքննել են, բայց շուտով նրան կճանաչեն որպես տուժող, նա ոչ մի կապ չունի Քոչարյանի ու Սերժի հետ»:
