«Ռուսաստանն Իրանի հետ շատ նորմալ հարաբերություններ ունի. մենք դաշնակիցներ ենք սիրիական հակամարտության լուծման գործում»,- այսօր, «Սպուտնիկ Արմենիա» մամուլի սրահում ասաց ՌԴ Պետական Դումայի Դաշնության խորհրդի միջազգային գործերի հանձնաժողովի փոխնախագահ Վլադիմիր Ջաբարովը՝ պատասխանելով հարցին՝ ինչպե՞ս է վերաբերվում հայ-իրանական համատեղ ծրագրերի իրականացմանը, ինչի մասին, ԻԻՀ կատարած այցի ժամանակ հայտարարեց ՀՀ վարչապետը, արդյոք հավանական է, որ այդ ծրագրերի իրականացման ինչ-որ մի պահից ՌԴ-ն եվս միանա դրանց:
Հիշեցնենք, Իրանի նախագահ Հասան Ռոհանիի հետ հանդիպումից հետո Նիկոլ Փաշինյանը հայտարարեց, որ իրանական կողմը պատրաստակամություն է հայտնել մասնակցել Հյուսիս–հարավ մայրուղու շինարարական աշխատանքներին: Նաեւ, վարչապետը հայտարարեց, որ Իրանի կողմից պատրաստակամություն կա՝ Հայաստան մատակարարվող գազի ծավալները մեծացնելու:
Ռուսաստանցի պատգամավորը լավ գիտի, թե ինչ նշանակություն ունի Իրանը Հայաստանի համար, նա լավ է հիշում, թե 1980-ականների վերջին և 1990-ականների սկզբին ինչ է արել Իրանը Հայաստանի համար, երբ Հայաստանը պատերազմի եւ շրջափակման մեջ էր: Եվ այն, որ այժմ Իրանը համագործակցելու է Հայաստանի հետ, Ռուսաստանի կողմից, ըստ նրա, ողջունելի է: Ավելին, նա այդ համագործակցության համար մեծ հեռանկարներ է տեսնում:
Ռուս պատգամավորը նաեւ նկատում է, որ Իրանը քիչ ջանք չի գործադրել Սիրիայում ծայրահեղականների ոչնչացման գործում. «ԱՄՆ-ը փորձում է Իրանին կրկին վերադարձնել պատժամիջոցների շրջան: Կարծում եմ, Իրանի հետ ցանկացած համագործակցության ընդլայնում միայն կարելի է ողջունել: Իրանական վարչակազմը հակված է հարևանների հետ համագործակցության, ծայրահեղականների դեմ պայքարին. սրանից օգուտ կքաղեն և ՌԴ-ն, և Իրանը, և Հայաստանը»,- ասաց Վլադիմիր Ջաբարովը:
Հեռուստակամրջի մասնակիցներն անդրադարձան նաեւ ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի հրավերով փետրվարի 25-27-ն աշխատանքային այցով Ռուսաստանի Դաշնություն՝ ՀՀ Ազգային ժողովի նախագահ Արարատ Միրզոյանի գլխավորած պատվիրակության այցին:
Վլադիմիր Ջաբարովը և ԴԽ դաշնային կառուցվածքի, տարածաշրջանային գործերի, տեղական ինքնակառավարման հանձնաժողովի անդամ Իգոր Չերնիշենկոն ասացին, որ երիտասարդ հայ խորհրդարանականներից լավ տպավորություն են ստացել:
«Երիտասարդ մարդիկ են, երիտասարդ, թարմ գաղափարներով, տաքարյուն երիտասարդ քաղաքական գործիչներ, որոնք ուզում են իրենց երկրի համար շատ բան անել: Այսօրվա հայկական խորհրդարանի երիտասարդ լինելն արտացոլում է երիտասարդության` լուրջ փոփոխություններ ունենալու ցանկությունը: Եվ ես համոզված եմ, որ այս երիտասարդ պատգամավորներն ամեն ինչ կանեն՝ շտկելու այն բացթողումները և խնդիրները, որոնք կուտակվել են հայ հասարակությունում վերջին տարիներին»,-ասաց Վլադիմիր Ջաբարովը:
«Կյանքը ցույց է տվել, որ իշխանության գալը հաճախ ամենագլխավոր խնդիրը. պետք է իրականացնել այն սպասումները, որոնք կապված ՀՀ-ի ներքին բազմաթիվ մարտահրավերների հետ»,- հավելեց Իգոր Չերնիշենկոն՝ նկատելով, որ «Իմ քայլի»՝ խորհրդարանում մեծամասնություն լինելը բարձրագույն պատասխանատվություն է ենթադրում:
Նելլի ԳՐԻԳՈՐՅԱՆ
