Անցյալ տարվա դեկտեմբեր ամսվա դրությամբ պետական մանկատներում խնամվում է 604 երեխա, որից 446 երեխան գտնվում են մասնագիտացված կենտրոններում: Դրան նախորդող տարվա նույն ժամանակահատվածի համեմատությամբ, մանկատներում խնամվող երեխաները 32-ով պակաս են: 2017-ին մանկատներում խնամվել է 636 երեխա: Այս մասին տեղեկանում ենք Ազգային վիճակագրական ծառայության հրապարակած տվյալներից:
Անցյալ տարի ավելի քիչ երեխաներ են մանկատներից եւ հանրակրթական հատուկ հաստատություններից տեղափոխվել կենսաբանական ընտանիք եւ հարազատների ընտանիք: Եթե 2017-ին 66 երեխա է հաստատություններից դուրս եկել, ապա անցյալ տարի 25 երեխա է կենսաբանական ընտանիք կամ հարազատների մոտ վերադարձել: 25-ից 23-ը հետ են գնացել կենսաբանական ընտանիքներ:
Խնամատար ընտանիքներում անցյալ տարվա դրությամբ 39 երեխա է խնամվում: 2017 թվականին խնամատար ընտանիքները 25 երեխա են խնամել:
Անցյալ տարի մեր երկրում 47 երեխա է որդեգրվել: Դրան նախորդող տարին` 56: Երկու տարի առաջ ավելի շատ` 75 երեխա է որդեգրվել:
Երեխաների խնամքի եւ պաշտպանության ցերեկային կենտրոններում առկա երեխաների թիվը 2017 թվականի համեմատությամբ, նվազել է: Եթե այդ տարին ցերեկային կենտրոններ է հաճախել 594 երեխա, ապա անցյալ տարի՝ 476 երեխա: Պետական մանկատներից դուրս եկած երեխաները` շրջանավարտները 10-ն են:
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ,
28.02.2019
