«Ի պաշտպանություն Լեռնային Ղարաբաղի» կազմկոմիտեի համակարգող, Հայաստանի դեմոկրատական կուսակցության նախագահ Արամ Սարգսյանը կարծում է, որ միանգամայն իրատեսական է եւ հնարավոր՝ 1988-ին Ադրբեջանի Սումգայիթ քաղաքում տեղի ունեցած հայկական ջարդերին իրավական բնութագրում տալը: Բայց դա պետք է պետական մակարդակով արվի, քանզի հասարակական կազմակերպությունները, որոնք զբաղվել են խնդրով, միջազգային դատարաններ դիմելու իրավասություն չունեն:
Արամ Սարգսյանի կարծիքով, հասարակական կազմակերպությունները բավական լավ փաստահավաք առաքելություն իրականացրել են եւ հարուստ բազա ունեն: Նա նկատի ունի ԼՂՀ նախկին արտգործնախարար Արման Մելիքյանի ղեկավարած հասարակական կազմակերպության կատարած աշխատանքը: Պետությանը մնում միայն հավաքել, համակարգել այդ ամենը՝ ասում է մեր զրուցակիցը:
Հիշեցնենք, ջարդերը տեւեցին երեք օր եւ տեղի ունեցան խորհրդային իշխանության լուռ անտարբերության պայմաններում: Խորհրդային բանակը, որը երկրորդ օրն արդեն Սումգայիթում էր, չմիջամտեց:
Այն, որ ԱԺ փոխխոսնակ Ալեն Սիմոնյանը նույնպես եկել էր հարգելու զոհերի հիշատակը, Արամ Սարգսյանը ողջունելի է համարում: Ալեն Սիմոնյանն իր անձնական կարծիքն էր բարձրաձայնել, որ հարցը իրավական եւ քաղաքական գնահատական պետք է ստանա: Արամ Սարգսյանն Aravot.am-ի հետ զրույցում ասաց՝ ուրախ կլինի, որ Ալեն Սիմոնյանը հետեւողական լինի. «Ես ամեն տարի այստեղ լինում եմ եւ համամիտ եմ ձեզ հետ, որ առաջին անգամն է, որ պետական այր է գալիս: Բայց, կարծում եմ, որ ճիշտ կլիներ, որ գար ոչ միայն Ալեն Սիմոնյանը, այլ՝ «Իմ քայլի» պատվիրակությունը: Այսօր այդ օրն է, որ մեր ազգային միասնությամբ արժեր հանդես գալ»:
Այլ մանրամասները՝ տեսանյութում
Սումգայիթյան զոհերի հիշատակը հարգելու էին եկել նաեւ «Լուսավոր Հայաստան» խմբակցության պատգամավորները: Aravot.am-ի հետ զրույցում, խմբակցության քարտուղար Գեւորգ Գորգիսյանն ասաց, որ իրենք փորձելու են հարցը միջազգային դատարանում վիճարկելու հանգամանքը խորհրդարանում բարձրացնել: Հավաքվածներն առաջ էին քաշում թեզը, որ նախ Հայաստանը պետք է կատարվածը ցեղասպանություն որակի: Գեւորգ Գորգիսյանն ասում է՝ դա վաղուցվա վեճ է, քանզի կարծիք կա, որ դրանով ստվեր կգցվի 1915-ի ճանաչման գործընթացի վրա:
Նա անդրադարձավ նաեւ երեկ Ադրբեջանում 20 տարվա ազատազրկման դատապարտված հայ գերի Կարեն Ղազարյանի հարցին: Ասաց, որ իրենց խմբակցության պատգամավորները խորհրդարանի երեք հանձնաժողովներում քննարկումներ են սկսել՝ հասկանալու համար, թե ի՞նչ հնարավորություններ կան՝ Կարեն Ղազարյանին օգնելու. «Փաստացի, մենք ռազմագերի ունենք եւ պետությունն ինչ-որ ձեւով պետք է միջամտի»:
Այլ մանրամասները՝ տեսանյութում
Քաղաքագետ Ալեքսանդր Մանասյանն էլ դժգոհ է, որ սումգայիթյան ցեղասպանությունը անտեսվեց խորհրդային իշխանությունների օրոք եւ քաղաքական ու իրավական գնահատականի չի արժանացել մինչ օրս:
Մանրամասները՝ տեսանյութում
Նելլի ԳՐԻԳՈՐՅԱՆ
