«Մի քանի տարի առաջ ՀՀ վարչապետի ստորագրությամբ ՄԻԵԴ է գնացել փաստաթուղթ, որ Մարտի մեկի տասը սպանությունները կատարվել են՝ «ելնելով ծայրահեղ անհրաժեշտությունից». Սրանից լավ ցուցմո՞ւնք: Սա Սերժ Սարգսյանի եւ Ռոբերտ Քոչարյանի ցուցմունքն է, որ սպանություններ են կատարվել՝ «ելնելով ծայրահեղ անհրաժեշտությունից»: Նրանք չէին մտածո՞ւմ, որ այդ փաստաթուղթը եւ 0038 հրամանը բացահայտվելու են»,-«Հայացք» մամուլի ակումբում այսօր լրագրողների հետ հանդիպմանն անդրադառնալով Մարտի 1-ի քրեական գործի ընթացքին՝ ասաց Հայ ազգային կոնգրեսի փոխնախագահ, ԱԺ նախկին պատգամավոր Արամ Մանուկյանը:
Ինչ վերաբերում է հարցադրմանը, թե իր կարծիքով՝ ինչո՞ւ է Սերժ Սարգսյանի ոչ թե մեղադրյալի, այլ վկայի կարգավիճակում, Արամ Մանուկյանը նկատեց. «Եթե մեղադրանք չկա, դա չի նշանակում, թե նա գործից դուրս է: Նա վեց ժամ հարցաքննվել է: Դժվար կլիներ վեց ժամ սուտ ասել եւ մեղա գալ: Մի քիչ համբերենք: Բացառվում է այս գործը ներկայացնել այնպես, որ մեկ մարդու վրա գցվի»:
Ապա Արամ Մանուկյանը նշեց, որ իր տեղեկություններով՝ ՀՔԾ-ն ողջ ծավալով աշխատում է այս գործի ուղղությամբ. «ՀԱԿ ակտիվիստները եւ կանայք կանչվում են հարցաքննությունների, դիմումներ են ներկայացնում, չենք շտապում»:
https://www.facebook.com/aravot.am/videos/557318368098971/
Լուիզա ՍՈՒՔԻԱՍՅԱՆ
