«Միջնորդության քննությունն ավարտվեց, դատարանը հեռացել է խորհրդակցական սենյակ որոշում կայացնելու»,- ԱԺ նախկին պատգամավոր Մանվել Գրիգորյանի փաստաբանների՝ դատավոր Մարինե Մելքոնյանին ինքնաբացարկի միջնորդություն ներկայացնելու և Մանվել Գրիգորյանին գրավի դիմաց ազատ արձակելու գործով դատական նիստի ավարտից հետո լրագրողների հետ զրույցում տեղեկացրեց Մանվել Գրիգորյանի փաստաբան Արսեն Մկրտչյանը:
Նա տեղեկացրեց, որ առաջիկայում դատարանը կհրապարակի մասնավորապես գրավի դիմաց Մանվել Գրիգորյանին ազատ արձակելու որոշումը:
Լրագրողների հարցին ի պատասխան՝ պաշտպանը տեղեկացրեց՝ Մանվել Գրիգորյանը ստացիոնար բուժման է քաղաքացիական հիվանդանոցում:
Փաստաբանը չցանկացավ մանրամասնել, թե դատավորի ինքնաբացարկի հիմքում ինչ են դրել, միայն փոխանցեց, որ թևակոխել են մի փուլ, երբ մի կողմ են դնում զգացմունքները և զբաղվում են միայն իրավունքի պաշտպանությամբ: Այնուհետև շեշտեց՝ դռնփակ նիստերը ճիշտ չի համարում մանրակրկիտ մեկնաբանելը:
Գրավի չափի վերաբերյալ հարցին ի պատասխան՝ պաշտպանն ասաց՝ գրավի չափը ավելի չէ, քան նախկինում առաջարկված և վճարվածները:
Նշենք, որ դատարանի որոշումը կհրապարակվի 17.30-ին:
Տաթև ՀԱՐՈՒԹՅՈՒՆՅԱՆ
