Երեւանի քաղաքապետ Հայկ Մարությանի կողմից Բուզանդի 1/3 շենքում գտնվող մի շարք լրատվական խմբագրություններ ստացել են ծանուցումներ այն մասին, որ պետք է 5 օրում ազատեն Երեւանի քաղաքապետարանին պատկանող տարածքը: Նման ծանուցումներ ստացել են նաեւ Իսահակյան 28, Արշակունյաց 4 հասցեում տեղակայված լրատվականները: Գրության մեջ քաղաքապետարանը նշել է՝ «հանրային գույքն արդյունավետ օգտագործման նպատակով»:
Այսօր «Հայելի» ակումբում հրավիրած ասուլիսում «Հրապարակ» օրաթերթի խմբագիր Արմինե Օհանյանն ասաց, որ միշտ չէ, որ հանրային գույքի արդյունավետությունը պետք է գնահատել միայն փողով, ինչպես պատկերացնում է մեր քաղաքապետը. «Եկեք նայենք՝ այս շենքն արդյո՞ք այդպիսի գայթակղիչ բիզնես տարածք է: Պատրա՞ստ են բարձր գներով վարձակալել այս շենքը: Երբ որ դու քո տան գույքն սկսում ես վաճառել՝ ապրելու համար, մի օր բան չես ունենա: Եթե իրենք խղճուկ ունեցվածքն ուզում են վաճառել, որ արդյունավետություն ապահովեն, չի ստացվելու: Մեր կողմից մերժված ՀՀԿ-ի վերաբերմունքից այս իշխանությունը շատ ավելի վատ վերաբերմունք ունի մամուլի հանդեպ: Ոչ մի նախորդ քաղաքապետ մտքի ծայրով չի անցկացրել, որ կարող են վերցնել մեզ տրամադրած 90 քմ տարածքը եւ ավելի արդյունավետ օգտագործել: Մենք խղճուկ տարածքի վրա մեծ ծախս ենք արել, պատուհաններ ենք փոխել եւ այլն, ո՞վ է փոխհատուցելու մեր ծախսերը: Այնպես չի, որ Հայկ Մարությանը դարձավ քաղաքապետ, ավելի շատ է մտածում մեր քաղաքի մասին, քան մենք»:
Արմինե Օհանյանն ասաց, որ ավագանու որոշում է եղել, պայմանագիր են կնքել, անհատույց այդ տարածքը տրամադրել են իրենց:
Հայաստանի ժուռնալիստների միության նախագահ Սաթիկ Սեյրանյանն ասաց, որ նման «սեւ թուղթ» եկել է նաեւ Իսահակյան 28 հասցեում տեղակայված ԶԼՄ-ներին:
Նա ասաց, որ երեկ զանգահարել է քաղաքապետի ընդունարան՝ որպես ՀԺՄ նախագահ. «Ակնկալում էի խմբագիրների հետ հանդիպում, մինչեւ ասուլիս կազմակերպելը: Գործավարը երկու անգամ ասաց՝ զբաղված է: Հետո հետեւեց խոսնակի գրառումը ֆեյսբուքում՝ ոչինչ չասող, մեդիային դարձյալ հարվածներ հասցնող»:
«Լուսավոր Հայաստան» խմբակցության ղեկավար Դավիթ Խաժակյանն ասել էր, որ ավագանու որոշում են խախտել, Սաթիկ Աեյրանյանը համաձայն է Խաժակյանի հետ՝ այդ գրությունները, որ ուղարկում են ԶԼՄ խմբագրություններին, ապօրինի է: Սաթիկ Սեյրանյանն ասաց, որ իշխանություններից հարգանք են պահանջում. «Սա նույն ձեռագիրն է, ինչ որդեգրել են նոր իշխանությունները՝ քննադատական խոսքի նկատմամբ»:
Սաթիկ Սեյրանյանն ասաց, որ եթե իսկապես ուզում են խնդրին լուծում տալ, Արշակունյաց 4 հասցեում տեղակայված շենքը կոչվում է Մամուլի շենք, թող այդ շենքից հանեն բոլոր այլ կազմակերպությունների եւ ԶԼՄ-ներին տարածք տան այդ շենքից:
«Նյութ» լրատվական գործակալության խմբագիրը՝ Աշոտ Աղաբաբյանն ասաց, որ այս շենքի կողքերը մի նախարար կա, որ տարածքներն իրենով է արել: Խոսքը Արամ Հարությունյանի՝ Բուլկիի մասին է. «Գնացեք դա վերցրեք»:
Քաղաքապետարանից արձագանքել են, որ անհավասարություն կա ԶԼՄ-ների միջեւ, օրինակ, «Հետքը» վճարում է տարածքի դիմաց, ուստի պետք է վճարեն նաեւ մյուսները: Մինչդեռ ըստ Աղաբաբյանի, այս հարցին ավելի հեշտ լուծում կա՝ «Հետքի» համար անվճար դարձրեք ու բոլորը կհավասարվեն:
Քաղաքագետ Աղասի Ենոքյանի խոսքով՝ ինչպես քաղաքական դաշտը իշխանությունները բաժանեցին սեւ ու սպիտակի, այնպես էլ հիմա լրատվական դաշտն են ուզում բաժանել:
Հռիփսիմե ՋԵԲԵՋՅԱՆ
