2016թ.-ին ՀՀ ոստիկանության ՊՊԾ գունդը զավթած եւ մի շարք ծանր հանցագործությունների կատարման համար մեղադրվող «Սասնա ծռերի» գործով հերթական դատական նիստում այսօր միջադեպ տեղի ունեցավ: Հարցաքննվում էր Շենգավիթ համայնքի նախկին ոստիկանապետ Արամ Հովհաննիսյանը, երբ դահլիճում՝ ապակե պատնեշից այս կողմ գտնվող «Սասնա ծռերի» համակիրների եւ գործով տուժող-ոստիկանների հարազատների միջեւ վիճաբանություն տեղի ունեցավ, ռեպլիկներ հնչեցին: Բղավոցներ էին հնչում նաեւ ապակե պատնեշից այն կողմ՝ հարցաքննվել պատրաստվող ոստիկանների եւ մեղադրյալների միջեւ:
«Այստեղ քաղաքացիական հագուստով սադրիչ-ոստիկաններ կան: Դատարանի հետ նախապես պլանավորած սադրանք է»,-բղավեց «Սասնա ծռեր» կուսակցության քարտուղարության անդամ Գեւորգ Սաֆարյանը:
«Որեւէ դիտավորություն չկա, ձեր կողմից է սկսվել»,-իր հերթին հայտարարեց դատական կարգադրիչների ղեկավարը:
Դատավոր Մեսրոպ Մակյանը մի քանի անձանց հանդեպ սանկցիա կիրառեց, եւ նրանք այլեւս չեն կարող ներկա լինել այս գործի քննությանը:
Լարված իրավիճակի պատճառով դատարանը որոշեց նիստը հետաձգել, իսկ առաջիկա նիստն անցկացնել դռնփակ՝ միայն ԶԼՄ աշխատակիցների ներկայությամբ:
Լուիզա ՍՈՒՔԻԱՍՅԱՆ
Հարգելի հեղինակը կարծես թե օբյեկտիվ ճշմարտությունը չի ներկայացնում:
ՊՊԾ գունդը չի զավթվել, ՊՊԾ գունդը գրավվել է, այն էլ` ժողովրդին ոտքի հանելու նպատակով:
“ՊՊԾ գունդը զավթած” արտահայտությունն արդեն իսկ մեղադրանք է, դուք դա իրավունք չունեք ներկայացնել, քանի որ պետական մեղադրողներ չեք: