Երեւանի պետական համալսարանի հոգաբարձուների խորհուրդը փետրվարի 28-ին գումարելու է արտահերթ նիստ։ Օրակարգում ռեկտոր Արամ Սիմոնյանի պաշտոնանկության հարցն է։
Տեղեկությունը մասամբ հաստատելով՝ ԵՊՀ անգլերենի թիվ 1 ամբիոնի վարիչ, հոգաբարձուների խորհրդի անդամ Մարգարիտա Ապրեսյանն ասաց. «Էլեկտրոնային փոստով ծանուցում եմ ստացել, որ լինելու է արտահերթ նիստ։ Բոլորին էլ ուղարկում են։ Ճիշտն ասած՝ չեմ նայել՝ ումից է ծանուցումը, երեւի քարտուղարն է ուղարկել։ Նիստի օրակարգը չկար»։
Նա ասաց, թե լրացուցիչ չի փորձել պարզել՝ ինչ պատճառով է նիստ հրավիրվում. «Մի քիչ զբաղված եմ, միջազգային քննությունների հարցն է, դրա համար խորամուխ չեմ եղել»։
Իսկ եթե պարզվի, որ առաջիկա նիստում ռեկտորին անվստահություն հայտնելու հարցն է լինելու, ինչպե՞ս կվերաբերվի դրան։ Ամբիոնի վարիչը չի շտապում հարցին միանշանակ պատասխանել։ «Ես չգիտեմ։ Գիտե՞ք ինչ, նախօրոք կանխագուշակումներ անել չեմ կարող։ Համենայնդեպս, ես իմ մտավորականի եւ համալսարանականի կարծիքը պարտավոր եմ արտահայտել։ Ես չգիտեմ՝ ինչ կլինի։ Չեմ կարծում՝ իմ կարծիքն այդքան կարեւոր լինի։ Այսինքն՝ հոգաբարձուների խորհրդի անդամներից մեկն եմ, բայց ժամանակը եւ իրադարձությունը ցույց կտան»,- ասաց Մարգարիտա Ապրեսյանը։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
