Մեկ կալանավորի վրա պետությունը ծախսում է ամսական 198 հազար դրամ, մեկ աղքատ մարդու համար՝ 33 հազար դրամ: Այսօր այսպիսի տվյալ հրապարակվեց «Թրանսփարենսի Ինթերնեշնլ հակակոռուպցիոն կենտրոն» (ԹԻՀԿ) ՀԿ-ի կազմակերպած միջոցառման ժամանակ: Մասնագետները մտահոգություն հայտնեցին, որ բյուջեում չունենք արդյունավետության ինդիկատորներ:
ԹԻՀԿ-ը ներկայացրեց արդարադատության նախարարության 2019 թ. ծրագրային բյուջեի արդյունքային ցուցանիշների վերլուծությունը:
Թե որքանով են արդյունավետ կառավարվել հանրային ֆինանսները օրինակ՝ քրեակատարողական ծառայություններ մատուցելիս, ԹԻՀԿ ծրագրի ղեկավար Վարուժան Հոկտանյանը վկայակոչում է ուսումնասիրության արդյունքները: Ըստ նրա, նշված է աշխատանքով ապահովված դատապարտյալների ու կալանավորվածների թիվը, սակայն նպատակահարմար կլիներ ունենալ ցուցանիշ թե քանի՞ տոկոս է ապահովվել աշխատանքով՝ աշխատունակ եւ աշխատել ցանկացող դատապարտյալներից կամ իրավաբանական եւ սոցիալական խորհրդատվություններ ստացած դատապարտյալների բավարարվածության աստիճանը տոկոսային արտահայտությամբ:
Վարուժան Հոկտանյանի խոսքի մանրամասները՝ տեսանյութում
Որքանո՞վ են մեր երկրում արդյունավետ կառավարվում հանրային ֆինանսները, ինչ խնդիրներ կան,ինչպետք է անեն կառավարության անդամները, որպեսզի անարդյունավետությունը նվազի, Aravot.am-ի հարցին Հանրային ֆինանսների քաղաքականության գծով փորձագետ Սարգիս Նասիբյանը պատասխանեց. «Հանրային բոլոր միջոցների ծախսերը պետք է կազմակերպել այնպես, որպեսզի լինի նպատակահարմար, արդյունավետ: Դրա հիմնական ցուցանիշները կարող են հանդիսանալ ոչ ֆինանսական ցուցանիշները, որոնք որ կարող են գնահատել տվյալ միջոցառումը, նրա քանակը, որակը, ժամկետայնությունը՝ շահառուի տեսանկյունից՝ թե շահառուն ինչ որակի ծառայություն է ստանալու,լինելու է բավարարված այդ ծառայությունից թե՝ ոչ»:
Պարոն Նասիբյանի խոսքով, մինչ այս բյուջետային ծախսերը կատարվում էին միայն ֆինանսական մասով. «Այսինքն՝ հաշվետվություն է ներկայացվում այն մասով, ինչքանով որ ծախսվում է ֆինանսական միջոցները: Պետք է անցնենք բյուջետային ծրագրավորմանը եւ պետք է համադրելի լինեն յուրաքանչյուր ֆինասական միջոցը իր քանակական եւ որակական ցուցանիշների հետ»:
Լուսինե ԲՈՒԴԱՂՅԱՆ
