Անհրաժեշտ է օրենքի ուժով ստեղծել կամավոր փրկարարի ինստիտուտ, որի նպատակն է ունենալ կամավորներից բաղկացած «պահեստային փրկարարական» ուժեր

Գաղտնիք չէ, որ Հայաստանի Հանրապետությանը սպառնում են մի շարք բնական աղետներ, որոնց արձագանքելու, ինչպես նաև դրանց հետևանքները վերացնելու համար իրավասու պետական մարմինների ռեսուրսները օբյեկտիվորեն կարող են անբավարար լինել:

Հայաստանի Հանրապետության համար բնական աղետներից ամենավտանգավորը թերևս երկրաշարժն է:

Մասնագետների ուսումնասիրությունները ցույց են տալիս, որ 9 և ավելի բալ երկրաշարժի դեպքում Հայաստանի Հանրապետության բնակֆոնդի զգալի մասը կփլուզվի կամ մասնակի կփլուզվի, և որպես դրա հետևանք կգրանցվեն մեծ թվով մարդկային կորուստներ:

Այս կանխատեսումները ստիպում են քայլեր ձեռնարկել, որպեսզի աղետների դեպքում փրկարարական և աղետների հետևանքների վերացման աշխատանքների իրականացմանը ներգրավվեն հնարավորինս մեծ թվով այդ աշխատանքների համար պատրաստված կամավորականներ:

Այս խնդիրը լուծմանն է ուղղված իմ հեղինակած «Կամավոր փրկարարի մասին» Հայաստանի Հանրապետության օրենքի նախագիծը:

Կարծում եմ, անհրաժեշտ է օրենքի ուժով ստեղծել կամավոր փրկարարի ինստիտուտ, որի նպատակն է ունենալ կամավորներից բաղկացած «պահեստային փրկարարական» ուժեր, նրանց պարբերաբար վերապատրաստել խոշոր աղետների դեպքում փրկարարական աշխատանքների և աղետների հետևանքների վերացման աշխատանքների իրականացմանը:

Օրենքի նախագծով նախատեսված է կամավոր փրկարարի կարգավիճակ ունեցող անձանց տալ նաև որոշակի առավելություններ, որի նպատակն է կամավոր փրկարարի կարգավիճակը դարձնել առավել գրավիչ:

Օրենքի ընդունումից և որոշակի ժամկետով կիրառումից հետո, որպես հաջորդ քայլ, առաջարկում եմ ԱԻՆ Փրկարար ծառայությունում ծառայության անցնելու համար որպես պարտադիր պահանջ սահմանել որոշակի ժամկետով կամավոր փրկարարի կարգավիճակ ունենալը:

Այսինքն, այն քաղաքացու համար, ով ցանկանում է աշխատանքի ընդունվել Փրկարար ծառայությունում, փրկարար լինելը նախ և առաջ պետք է լինի առաքելություն, հետո միայն որպես աշխատանքային պարտականություն:

Կամավոր փրկարարի ինստիտուտի ստեղծումը հնարավորություն կտա համեմատաբար փոքր թվով կայուն փրկարարական ուժեր ունենալով, անհրաժեշտության դեպքում ապահովել մեծ թվով անձանց մոբիլիզացիան և ներգրավումը փրկարարական աշխատանքների և աղետների հետևանքների վերացման աշխատանքների իրականացմանը:

«Կամավոր փրկարարի մասին» Հայաստանի Հանրապետության օրենքի նախագիծը ուղարկում եմ օրենսդիր և գործադիր իշխանության համապատասխան մարմիններին և պաշտոնատար անձանց:

Հայկ ԱՐԱՄՅԱՆ