Արմավիրի մարզի Արտաշար համայնքի բնակիչները ոտքի են կանգնել, պահանջում են հետ տալ համայնքապատկան հողատարածքները, որոնք 20-20 տարի է՝ բիզնես նպատակներով հատկացվել են մասնավոր ընկերությանը: Արտաշարցիների խոսքով, ընկերությունը համայնքի հետ ոչ մի իրավական, պայմանագրային հարաբերություն չունի եւ հենց այնպես հողերն օգտագործում է՝ չհաշված, որ մեկ հեկտարի համար տարեկան ընդամենը 3500 դրամ է վճարում:
Այսօր արմավիրցիները կառավարության առաջ բողոքի ցույց էին կազմակերպել՝ հույս ունենալով, որ նոր իշխանությունները վերջ կտան այս «ապօրինի գործողություններին»: Նրանց խոսքով, իրենց արոտավայրերը թողած, ստիպված են լինում տարեկան 100-150 հազար վճարել, որպեսզի իրենց անասունները այլ արոտավայրերից օգտվեն, մինչդեռ այդ համայնքապատկան հողատարածքները կարող էին այդ նպատակով օգտագործվել:
Արտաշար համայնքի բնակիչ Միշա Գենջոյանի ներկայացմամբ, գործը դատական ատյաններով անցել է, նաեւ տնտեսական դատարանով է անցել, բայց վճիռներն ի վնաս գյուղացու են եղել:
Մեկ այլ բնակիչ էլ նկատեց՝ մինչեւ վճիռը ասում են՝ հողը գյուղացունն է, վճռից հետո ասում են՝ արդեն ձերը չի:
Արմավիրցիներին ընդունեց կառավարության նամակների բաժնի ղեկավար Ալեքսանդր Ղազարյանը՝ խոստանալով, որ կառավարությունը խնդիրը կուսումնասիրի եւ սահմանված ժամկետում գյուղացիներին կպատասխանի:
Լուսինե ԲՈՒԴԱՂՅԱՆ
