«Մենք մեր շահն ու հետաքրքրությունն ունենք Սիրիայում՝ կայացած հայկական համայնք, որը մեծապես տուժել է սիրիական ճգնաժամից: Այն, որ հումանիտար առաքելությունը Սիրիա է ուղարկվել ռուսական հովանու ներքո, տրամաբանական է: Էլ ո՞ւմ հովանու ներքո լիներ, երբ Սիրիայի կառավարության կողմից ճանաչված եւ ընդունված միակ կոալիցիան ՌԴ գլխավորած կոալիցիան է, ոչ թե ԱՄՆ-ինը»,- «Տեսակետ» մամուլի ակումբում այսօր անդրադառնալով ՀՀ-ի կողմից Սիրիա հումանիտար առաքելություն ուղարկելուն՝ ասաց թուրքագետ Անուշ Հովհաննիսյանը:
Նա շեշտեց, որ առաքելությունը ոչ թե ռազմական գործողություններ է իրականացնելու, այլ հումանիտար օգնություն է ցուցաբերելու. «Այստեղ խնդիր չեմ տեսնում: Խնդիրն այն է, որ մեր՝ Սիրիայում ներկա լինելու պատճառը հասկանալի կերպով պետք է հասցնենք արեւմտյան գործընկերներին, որպեսզի դա չընկալվի որպես այս կամ այն կողմի ճնշումներին տուրք տալու քայլ»:
Անուշ Հովհաննիսյանը կարծում է, որ ՀՀ-ն իր գործընկեր-երկրների հետ բացատրական աշխատանք պետք է իրականացներ հումանիտար առաքելության մասին, սակայն դա, ըստ մասնագետի, համապատասխան գերատեսչությունների կողմից պատշաճ չի կատարվել:
Լուիզա ՍՈՒՔԻԱՍՅԱՆ
