Կինոռեժիսորներ Էդգար Բաղդասարյանը եւ Հարություն Խաչատրյանը լրագրողների հետ զրույցում ասացին, որ իրենց ֆիլմերն էլ են պատրաստվում ներկայացնել Ազգային կինոյի «Անահիտ» մրցանակաբաշխությանը: Էդգար Բաղդասարյանը կներկայացնի իր «Էրկեն գիշերը»:
Հարություն Խաչատրյանը կներկայացնի «Վերադարձողները» վավերագրական ֆիլմը, որը նոր է ավարտել: « Երկու` Նյոնի (Շվեյցարիայի) եւ Մոսկվայի Ա կարգի փառատոնից, խնդրել էին ֆիլմը: Ես դիմեցի նախարարություն եւ խնդրեցի, որ շտապ անհրաժեշտ է թարգմանել ու լուսագրեր ավելացնել, որպեսզի ուղարկենք փառատոներին, սակայն մերժում ստացա: Այժմ շնորհակալ եմ, որ մերժեցին այդ փոքրիկ գումարը տրամադրել, թեեւ նեղացած էի եւ դեպրեսիվ վիճակի մեջ էի: Բայց հիմա նայում եմ, որ որոշ թերություններ կան իմ ֆիլմում, այն կվերանայեմ, ավելի կկրճատեմ, կփոխեմ եւ մյուս տարի կներկայացնեմ»,-ասաց Հարություն Խաչատրյանը:
Մանրամասն` տեսանյութում
Խոսելով վերջին երկու տարիների մասին, ռեժիսորն ասաց, որ բավականին ֆիլմեր են նկարվել` լավ կամ վատ, միջակ եւ թերի. «Նորանոր մրցանակաբաշխություններ ենք ստեղծում, որոնք ինքնանպատակ չեն: Առաջիկայում մասնագիտական գիլդիաների մրցանակաբաշխություն էլ կկայանա: Ինչո՞ւ ենք դա անում, որպեսզի մարդիկ ոգեւորվեն, զգան, որ իրենց արվեստը նկատվում եւ գնահատվում է…Այնպես որ մրցանակաբաշխությունը ճանապարհներից մեկն է կինոմթնոլորտ ստեղծելու»:
Մանրամասն` տեսանյութում
Հարություն Խաչատրյանը ճիշտ չի համարում նաեւ պետական որեւէ անձի` այս կամ այն ընտրող հանձնաժողովներում ընդգրկվելը, դա անտակտություն եւ մեծ սխալ է որակում. «Նախարարությունը պետք է հեռու մնա այդ ամենից եւ զբաղվի միայն մշակութային քաղաքականությամբ ու ժառանգության պահպանումով, ոչ թե մտնի տարբեր հանձնաժողովների մեջ եւ որոշի ինչքան փող տա եւ ում տա»:
Ասուլիսի ժամանակ կրկին անդրադարձ եղավ հացադուլի դիմած ռեժիսոր Հովհաննես Գալստյանին:
«Սա հեղափոխական շնչի տակ գնաց` փողոցներ փակել, բողոքել, սովամահ լինել կամ կախվել… Բողոքի այդ ձեւը հեղափոխությունը բերեց: Կարծում եմ, որ պետք է բանակցությունների տեղ թողնել: Մանավանդ արվեստագետները շատ զգացմունքային եւ ոչ պրակտիկ մարդիկ են, իսկ նախարարությունը պետք զբաղվի նման հարցերով, լուրջ քաղաքականություն տանի, որպեսզի երկխոսություն կայանա»,-ասաց Հարություն Խաչատրյանը
Մանրամասն` տեսանյութում քիչ անց:
Գոհար ՀԱԿՈԲՅԱՆ
