«Հոգեբանները մինչեւ եկել են՝ կալանավորն անշնչացած է եղել, կախվել է». Նախարարը՝ անչափահաս երեխայի բռնաբարելու մեջ մեղադրվողի մասին

Ինչպես տեղեկացրել ենք, երեկ ողբերգական միջադեպ է տեղի ունեցել Նուբարաշեն ՔԿՀ-ում, կալանդավորներից մեկը կախվել էր:

Այս մասին այսօր արդարադատության նախարար Արտակ Զեյնալյանը, որը հրավիրվել էր ԱԺ մարդու իրավունքների պաշտպանության եւ հանրային հարցերի հանձնաժողով քննարկման, ասաց, որ այդ կալանավորը գտնվել է կարանտինի մեջ, նոր է տեղափոխվել քրեակատարողական հիմնարկ:

Նույն հանցանքի համար երկու կալանավոր է այդ օրը տեղափոխվել, հոգեբանները աշխատելիս են եղել մեկի հետ, մինչեւ վերադարձել են, մյուսն արդեն անշնչացած է եղել:

Զեյնալյանն ասաց, որ այդ կալանավորը մեղադրվում է անչափահաս երեխայի բռնաբարելու մեջ. «Այդպիսի դեպքեր լինում են, անցյալ տարի եւս արձանագրվել է նման դեպք: Իհարկե, ցավալի է: Երկու անգամ նա պատիժ է կրել, սա նրա երրորդ հանցագործությունն էր»:

Նաիրա Զոհրաբյանը հարցրեց՝ նո՞ւյն հանցանքի համար է դատապարտվել՝ Զեյնալյանը պատասխանեց, որ ոչ:

Հռիփսիմե ՋԵԲԵՋՅԱՆ