Այսօր խանութների մի քանի տասնյակ սեփականատերեր կառավարության առաջ կրկին բողոքի ցույց էին կազմակերպել՝ ընդդեմ «Աշտարակկաթ» ընկերության գործողությունների: Նրանց բոլորին դատի է տվել կաթնամթերք արտադրող ընկերությունը՝ պահանջելով վճարել իրացրած արտադրանքի դիմաց գումարները:
Տնտեսվարողները, սակայն պնդում են, որ իրենք ոչ մի պարտք ու պահանջ չունեն ընկերության հետ, այդ մասին իրենց գրություններով հաստատել են նաեւ ապրանքի առաքիչները, որոնք գրել՝ստորագրել են, որ ապրանքը մատակարարել են, գումարը կանխիկ ստացել ու փոխանցել ընկերության պատասխանատուներին: Խանութպանների խոսքով, իրենց վրա ամիսների պարտք-գումարներ են բարդել,մինչդեռ մեկ-երկու անգամ ապրանքի դիմաց չվճարելու պարագայում «Աշտարակ կաթը» ապրանք չէր մատակարարի:
Մի շարք տնտեսվարողների գործեր այս օրերին դատարաններում են:
Եվ, եթե առաջին ատյանի դատարանը եղել է, որ վճիռները հօգուտ տնտեսվարողի է կայացրել՝ հիմք ընդունելով հենց «Աշտարակ կաթի» աշխատողների վկայությունները, որոնք խանութներին ապրանք են մատակարարել, ապա Վերաքննիչ դատարանը, խանութների սեփականատերերի խոսքով, անցկացնելով փակ դատ, բավարարել է «Աշտարակ կաթի» հայցը: Այսինքն՝ տնտեսվարողները դատարանի որոշմամբ, պետք է հարյուր հազարների գումարներ վճարեն ընկերությանը՝ իբրեւ մատակարարված ապրանքի դիմաց պարտք մնացած գումարներ:
Կառավարությունից տնտեսվարողները երթով շարժվեցին դեպի Գլխավոր դատախազություն:
Մանրամասները՝ տեսանյութում:
Լուսինե ԲՈՒԴԱՂՅԱՆ
