«Մեծ կարեւորություն եմ տալիս այցին մի երկիր, որի հետ Վրաստանը եւ մեր ժողովուրդը կիսում են երկարաժամկետ բարեկամական հարաբերություններ»,-լրագրողների հետ զրույցում այսօր հայտարարեց պաշտոնական այցով ՀՀ ժամանած Վրաստանի պաշտպանության նախարար Լեւան Իզորիան: Նա նշեց, որ արդյունավետ քննարկումներ է ունեցել ՀՀ պաշտպանության նախարար Դավիթ Տոնոյանի հետ այն հարցերի շուրջ, թե ինչպես պետք է խորացնել երկու երկրների ՊՆ-ների եւ զինված ուժերի միջեւ հարաբերություններն ու վստահությունը:
«Այսօր ստորագրված համաձայնագրով մենք նախատեսում ենք ռազմավարական մակարդակում փոխայցելությունների շարունակություն, սերժանտական կազմի վերապատրաստում, ռազմական բժշկության եւ ռազմական կրթության ոլորտում գործակցություն»,-նշեց վրաստանցի պաշտոնյան, ապա հավելեց,-«Կցանկանայի առանձնացնել գործակցության նոր ուղղություն՝ պաշտպանության ոլորտում բարեվարքության ամրապնդում, որի առնչությամբ Վրաստանը պատրաստ է իր փորձը կիսել ՀՀ-ի հետ: Վրաստանի ՊՆ փորձագետներն իրենց փորձը փոխանցում են ՆԱՏՕ-ի անդամ եւ գործընկեր մի շարք երկրներին: Մեր զինծառայողները ծառայում են Աֆղանստանում՝ ներդրում ունենալով միջազգային անվտանգության ոլորտում»:
Ապա Լեւան Իզորիան ասաց, որ գնահատում է հայ զինծառայողների մասնակցությունը՝ Վրաստանում 2018թ.-ին անցկացված ՆԱՏՕ-ի զորավարժություններին. «Հուսամ՝ հայկական կողմը կշարունակի ակտիվ մասնակցել Վրաստանում ՆԱՏՕ-ի հովանու ներքո իրականացվելիք նման միջոցառումներն»:
Լուիզա ՍՈՒՔԻԱՍՅԱՆ
(Նախարարներին հարցեր ուղղելու հնարավորություն լրագրողները չունեին)
