«Ունենալով բարեկամական դարավոր հարաբերություններով հպարտանալու բոլոր հնարավորությունները՝ ՀՀ-ն եւ Վրաստանը կարեւոր նշանակություն ունեն միմյանց համար մի շարք բնագավառներում եւ պետք է ընդլայնեն իրենց գործակցությունը»,-պաշտոնական այցով ՀՀ այցելած Վրաստանի պաշտպանության նախարար Լեւան Իզորիայի հետ հանդիպումից հետո այսօր ՀՀ ՊՆ-ում լրագրողների հետ հանդիպմանը հայտարարեց ՀՀ պաշտպանության նախարար Դավիթ Տոնոյանը:
Նա տեղեկացրեց, որ քննարկել են ՀՀ-Վրաստան հարաբերություններին, միջազգային եւ տարածաշրջանային անվտանգությանն առնչվող հարցեր:
«Պարոն Իզորիայի հետ միակարծիք եմ պաշտպանության բնագավառում մեր գործունեությունն ընդլայնելու եւ դրանում նոր ոլորտներ ներառելու հարցում: Հավաստիացնում եմ, որ ՀՀ-ն եւ Վրաստանը հարգում են միմյանց ազգային անվտանգության ամրապնդմանն ուղղված լուծումները եւ միտված են անվտանգ Հարավային Կովկաս ունենալու գաղափարին»:
Դավիթ Տոնոյանը նաեւ տեղեկացրեց, որ Վրաստանի իր պաշտոնակցի հետ հանդիպման արդյունքում այսօր ստորագրվել է ՀՀ-ի եւ Վրաստանի միջեւ 2019թ.-ի ռազմական գործակցության ծրագիրը, որը ստորագրվում է դեռեւս 2010թ.-ից. «Այս տարվա ծրագիրը հագեցած է պաշտպանության բնագավառի մի շարք ոլորտի միջոցառումներով՝ ռազմական կրթություն, սերժանտական համակարգի վերապատրաստում, մարդու իրավունքներ, կոռուպցիայի դեմ պայքար»:
Լուիզա ՍՈՒՔԻԱՍՅԱՆ
(Նախարարներին հարցեր ուղղելու հնարավորություն լրագրողները չունեին)
