Հայաստանի կինեմատոգրաֆիստների միության նախագահ, կինոռեժիսոր Հարություն Խաչատրյանը լրագրողներին հայտնեց, որ աշխատում են Կինոյի մասին օրենքի նախագծի փոփոխությունների վրա եւ պատրաստվում են մինչեւ տարեվերջ այն ներկայացնել ԱԺ եւ կառավարություն: Նրա խոսքով, եղած խնդրահարույց նախագծով ծիծաղելի քաղաքականություն էր տարվում հայաստանցի կինոարտադրողների հետ կապված եւ դժվարությունների առաջ կանգնեցնում նրանց, անգամ ստիպում դիմել կեղծարարության: Մինչդեռ միության նախագահի խոսքով, ոչ ոք իրավունք չունի տեղացի կինոարտադրողներին վերածել զուտ ծառայություն մատուցող հիմնարկների:
Մանրամասները` տեսանյութում:
Նա ասաց նաեւ, որ օրենքը թերի էր այն առումով, քանի որ փոխանակ անկախ լինելու, որոշում կայացնողների թվում մշակույթի նախարարության ներկայացուցիչներ էլ պետք է լինեին:
«Ժամանակակից մարդիկ ուշադրություն չեն դարձնում կինոյին, մինչդեռ այն լուրջ զենք է, լուրջ գործիք է փոքր երկրների համար… Շատերը հայկական կինոյին քամահրանքով են վերաբերվում, մինչդեռ այն յուրահատուկ է եւ միջազգային հարթակներում ցուցադրելիս զարմանք է առաջացնում: Պարզվում է նաեւ, որ մեր համր կինոն էլ լուրջ մակարդակի կինո է»,- շեշտեց կինոռեժիսորը:
Ասուլիսի ժամանակ Հարություն Խաչատրյանը վերջին իրողություններին էլ անդրադարձավ: Ասաց, որ դրանք շատ հետաքրքիր ու անսպասելի էին, թեեւ նրա ձեւակերպմամբ, բավականին կասկածելի բաներ էլ կան, հատկապես մշակույթի հանդեպ քաղաքականությունը:
Ինչ վերաբերվում է մշակույթի նախարարության օպտիմալացմանը, Հարություն Խաչատրյանի խոսքերով, լավ կլիներ, որ քաղաքականությունը փոխվեր, զբաղվեին մշակութային ժառանգության լուրջ պահպանությամբ: «Այնքան հարցեր կան, որ կկորեն կրթության նախարարության ոլորաններում ու խորխորատներում»,-ասաց նա:
Մանրամասները` տեսանյութում:
Գոհար ՀԱԿՈԲՅԱՆ
