Երեւանի ընդհանուր իրավասության դատարանի դատավոր Դավիթ Հարությունյանի այսօրվա որոշմամբ վերացվել է «Ֆլեշ» ՍՊԸ տնօրեն Բարսեղ Բեգլարյանի՝ հայտնի որպես «Ֆլեշի Բարսեղ», խափանման միջոցը, այն է՝ անձնական երաշխավորություն (Բեգլարյանը կալանավորված չէ): Այս մասին Aravot.am-ին տեղեկացրեց Բարսեղ Բեգլարյանի շահերի պաշտպան, փաստաբան Կրոմվել Գրիգորյանը:
Նա նաեւ հայտնեց, որ դատարանի նույն որոշմամբ՝ վերացվել է գործով մյուս մեղադրյալի՝ Հրայր Հովսեփյանի խափանման միջոցը: Նրա հանդեպ էլ կիրառված էր ստորագրությամբ երկրից չհեռանալու մասին խափանման միջոց:
Այսպիսով, այս գործով երկու մեղադրյալների հանդեպ որեւէ տեսակի խափանման միջոց կիրառված չէ: Բարսեղ Բեգլարյանը եւ նրա ՍՊԸ-ի բազայի պետ Հրայր Հովսեփյանը, հիշեցնենք, մեղադրվում են 2016թ.-ին «Ֆլեշ Մոտորս» ընկերության նախկին կոմերցիոն տնօրեն Արման Մկրտումյանի նկատմամբ բռնություն գործադրելով, նրա կյանքի և առողջության համար վտանգավոր բռնություն գործադրելու սպառնալիքներով ինքնիրավչություն կատարելու եւ այդ կերպ Մկրտումյանի շահերին էական վնաս պատճառելու համար:
Բեգլարյանն ու Հովսեփյանը մեղադրանքը չեն ընդունում: Այս գործով առաջիկա դատական նիստի օրը դեռ նշանակված չէ:
Լուիզա ՍՈՒՔԻԱՍՅԱՆ
