Օրերս մեր կազմակերպություն դիմած 64-ամյա թոշակառու Հասմիկ Մամբրեյանը հայտնել է, որ 2017 թվականի մարտ ամսից ինքը ներգրավված է թիվ ԵՇԴ/3473/02/17 քաղաքացիական գործում (դատավոր՝ Նաիրա Հովսեփյան) որպես պատասխանող: Ծանոթանալով հայցապահանջին՝ պարզել է, որ հայցվոր Սոֆյա Սողոմոնյանը դիմել է դատարան եւ պահանջել բնակելի տան մի հատվածի նկատմամբ ձեռքբերման վաղեմության ուժով (ՀՀ քաղ. օրենսգրքի 187 հոդված) ճանաչել իր սեփականության իրավունքը:
Ծանոթանալով դիմումին եւ կից ներկայացված փաստաթղթերին՝ պարզվել է, որ վեճի առարկա հանդիսացող բնակելի տունը սեփականության իրավունքով պատկանում է դիմումատու Հասմիկ Մամբրեյանին: Վերջինս մշտապես հաշվառված կարգով իր ընտանիքի անդամների հետ միասին բնակվել է այդ տանը եւ երբեք չի բացակայել տնից: Կատարել է բոլոր անհրաժեշտ մուծումները եւ վճարները, պահպանել է գույքը, օրինական կերպով տիրապետել է այն որպես սեփական գույք:
Տիկին Հասմիկը հայտնել է նաեւ, որ «հայցվորն իր հարազատ աղջիկն է, որին միշտ օգնել է թե նյութապես, թե բարոյապես: Նրան է հատկացրել իր տան մի մասնաբաժինը, որպեսզի ավելորդ տեղը տան վարձ չտա եւ իր երեխաների վրա ծախսի այդ գումարը, կարողանա յոլա գնալ եւ պահել երեխաներին: Օրերից մի օր էլ, չբավարարվելով այդ օգնությունից, դատի է տվել իրեն, պահանջելով իր տան մի մասը»:
Հարցի բարոյական կողմը թողնելով մի կողմ՝ անցնենք գործի իրավական կողմին: Կարդալով հայցը եւ ուսումնասիրելով որոշ փաստաթղթեր՝ կարելի է հստակորեն եզրակացնել, որ դատարանը շուրջ երկու տարի «քննում է» ակնհայտ անհիմն հայցի վրա հիմնված դատական գործ:
Ինչ է քննում դատարանը, ինչպես է քննում, դժվար է կռահել, բայց սույն քաղաքացիական գործով արդեն երկրորդ անգամ վճիռ կայացնելու օր է նշանակվում, սակայն վճիռ չի կայացվում: 2019 թվականի հունվարի 26-ին դատարանի կողմից նշանակված վճռի կայացման օրը հետաձգվել է՝ «դատարանը որոշել է նիստը հետաձգել», իսկ 2019 թվականի փետրվարի 14-ին նշանակված վճռի կայացման օրը հետաձգվել է՝ «դատարանում թանաք չկա» դատավորի մեկնաբանություններով:
Հետեւությունը թող մնա ոլորտի պատասխանատուներին:
Մինչ այդ 64-ամյա թոշակառու պատասխանողը պարտաճանաչ կերպով թող գնա ու գա դատարան, կամ կկայացվի վճիռ, կամ էլ…
ԽԱՉԻԿ ՄԱՐՈԶՅԱՆ
«Իրավաբանների եւ
հոգեբանների միջազգային
ասոցիացիայի» նախագահ
«Առավոտ» օրաթերթ,
19.02.2019
Դատարանը 14.02.2019թ-ի վճռով մերժել է Սոֆյա Սողոմոնյանի հայցը՝ կայացնելով հիմնավոր և օրինական դատական ակտ՝ հօգուտ իմ վստահորդ Հասմիկ Մամբրեյանի:
Դատարանի վճիռը ստացել ենք 20.02.2019թ-ին: Բոլոր դեպքերում գործին մասնակցող փաստաբանի հետ կապ հաստատելը խրախուսվում է:
Շնորհակալություն