Հազարավոր տարիների ընթացքում ոչնչացել են բազմաթիվ ազգեր, քաղաքակրթություններ ու պետություններ: Անփոփոխ է մնացել միայն Մետաքսի մեծ ճանապարհը՝ արևելքն ու արևմուտքը կապող օղակը:
Դեռ 2013 թ.-ին այն նոր շունչ ստացավ. Չինաստանն առաջ քաշեց «Նոր Մետաքսի ճանապարհ. տնտեսական գոտի» հայեցակարգը, որի նպատակն էր ժամանակակից առևտրային մայրուղիների տեսքով ձևավորել «Նոր մետաքսի ճանապարհ»-ը՝ Շանհայից մինչև Բեռլին: Այս հայեցակարգը փետրվարի 17-ին միջոցառման շնորհիվ իրար էր միահյուսել հայկական և չինական մշակույթները:
Այն տեղի ունեցավ Հայաստանի նկարիչների միությունում և նվիրված էր Չինաստանի Ժողովրդավարական Հանրապետության յոթանասուն ամյակին և «Նոր մետաքսի ճանապարհ. տնտեսական գոտի» հայեցակարգին: Միջոցառման ընթացքում հայ նկարիչներ Անդրեյ Շուգարովի, Կայծ Վանիկյանի, Տիգրան Սմբատյանի և Փայլակ Վանիկյանի ցուցահանդեսն էր: Ներկաների համար կատարեցին չինարեն և հայերեն երգեր, ցուցադրվեցին հայկական և չինական ազգային հագուստները:
Միջոցառման կազմակերպիչ Իզաբելլա Մուրադյանը մեզ հետ զրույցում նշեց, որ միջոցառման նպատակը հայ-չինական հարաբերությունների ամրապնդումն է:
«Միջոցառումը առաջինը չէ, և այսպիսի ծրագրերը շարունակական են լինելու: Մեր նպատակն է հայկական կողմին «Նոր մետաքսի ճանապարհ. տնտեսական գոտի» հայեցակարգի մասին իրազեկելը: Օրինակ՝ հարևան պետություն Վրաստանն արդեն միացել է այդ ծրագրին և ստացել է 6 մլդ դոլլարից ավելի գումար իր ճանապարհները վերանորոգելու համար: Եվ ես ցավում եմ, որ մեր հայկական իշխանությունները մի քանի տարի արդեն և այսօր ևս չեն ներգրավվում այդ շրջանակներում, չեն օգտագործում հայ-չինական հարաբերությունները»:
Միջոցառման ավարտին հյուրերն իրենց ցանկությամբ բեմ էին բարձրանում և հայտնում իրենց կարծիքը ցուցահանդեսի, միջոցառման վերաբերյալ: Նրանք նույնպես կարևորում էին Նոր մետաքսի ճանապարհը հայ-չինական հարաբերությունների ամրապնդման հարցում:
