Ըստ ժողովրդական ավանդության՝ Սուրբ Սարգիս զորավարի տոնի նախօրեին ջերմաստիճանը կտրուկ նվազում է: Ժողովրդական ասքը՝ «Սուրբ Սարգսի բուքը», Ապարանում ամենօրյա երևույթ է:
Փետրվարի 16-ին Ապարանում անցկացվեց «Ապարանյան ձմեռ» փառատոնը: Մարզամշակութային միջոցառման հետաքրքրության և սպասվածության սահմանները սկսվում են Ապարանից և հասնում մինչև Ռուսաստան, Գերմանիա, Ավստրիա և այլ երկրներ …
Գերմանացի Ֆրիդրիխ Յանգերը Ապարան արդեն երրորդ անգամն է այցելում:
«Փառատոնի մասին տեղեկացել էի ինձ սպասարկող զբոսաշրջային կազմակերպությունից: Սա հրաշալի համընկնում էր իմ՝ Հայաստան կատարած այցի հետ: Կարծում եմ՝ այս քաղաքը հիանալի հնարավորություններ ունի ձմեռային տուրիզմի կենտրոն դռնալու»:
Միջոցառումը կազմակերպվել է Ապարանի համայնքապետարանի նախաձեռնությամբ: Փառատոնին աջակցել են Եվրասիա բարեգործական հասարակական կազմակերպությունը, Հայաստանի ձնեմարտի ֆեդերացիան, «Վորլդ Վիժն» կազմակերպության ապարանյան գրասենյակը և «Շրջակա միջավայրի կայունության աջակցման կենտրոն» ՀԿ-ն:
Միջոցառման կազմակերպիչները փառատոնի կարևորագույն նպատակը համարում են հին ավանդույթների ու մշակույթի վերականգնումը: Փառատոնին ներկա էր նաև Արագածոտնի նորանշանակ մարզպետ Դավիթ Գևորգյանը:
Դավիթ Գևորգյանը կարևորեց մարզական, մշակութային միջոցառումների անցկացումը:
«Այսպիսի միջոցառումների ընթացքում կարողանում ենք շփվել աշխատանքային իրավիճակից դուրս: Իմ մոտեցումն է, որ նման միջոցառումները համախմբեն ամբողջ մարզին, և «Ապարանյան ձմեռ» փառատոնն ավելի մեծ մասշտաբով մասնակիցներ ընդունի, որոնց, վստահ եմ, ապարանցիները կդիմավորեն մեծ սիրով»:
Միջոցառումը երկու մասից էր բաղկացած՝ մշակութային և մարզական: Մշակութային մասում նախ ներկայացվեցին Սուրբ Սարգսի և Տյառնընդառաջի ծիսակատարությունները, ապա համայնքները հանդես եկան ազգային երգ ու պարով:
Մարզական մասում դահուկավազքի, լեռնադահուկի, պարան ձգելու, բազկամարտի կողքին կենտրոնական դեր ուներ Հայաստանում առաջին անգամ անցկացվող ձնագնդի առաջնությունը, որը կազմակերպվել էր Հայաստանի ձնագնդի ֆեդերացիայի կողմից: Ֆեդերացիան ձևավորվել է այս տարի՝ միջազգային փորձի հիման վրա:
Ֆեդերացիայի համահիմնադիր Տիգրան Պետրոսյանը նշեց, որ ապագայում պլանավորում են ստեղծել Հայաստանի ձնամարտի հավաքական:
«Հայաստանի կլիմայական պայմանները նպաստավոր են սպորտաձևի զարգացման ու տարածման համար: Ապարան քաղաքը ֆեդերացիայի գործունեության զարգացման համար ունի մեծ տեսլական, մենք համագործակցություն ենք սկսել համայնքապետարանի հետ, սպորտաձևի տարածումը զարկ կտա Ապարանում ձմեռային զբոսաշրջության զարգացմանը: Իսկ «Ապարանյան ձմեռ» փառատոնը մեզ հնարավորության է տալիս ոչ միայն սպորտաձևը ցույց տալու, տարածելու, այլև խաղերի ընթացքում աչքի ընկնող խաղացողները հետագայում պոտենցյալ թիմակիցներ կարող են դառնալ մեզ համար»:
Առաջնության առաջին պայքարն (սիրողական) ընթացավ Ապարանի Եղիպատրուշ գյուղի թիմի և Երևանի Մխիթար Սեբաստացի կրթահամալիրի սաների միջև: Հաղթանակ տարան տեղացիները:
Փառատոնը և ձնամարտի առաջնությունը կունենան շարունակական բնույթ:
Զարա ՂԱԶԱՐՅԱՆ
