«Երբ մենք ասում ենք հեղափոխություն, նկատի ունենք, որ կապիտալը, փողը չի առաջնային գործոնը, այլ մարդու ստեղծարար ունակությունը: Մենք փոխում ենք աշխարհում դրվածքը տնտեսության զարգացման: Փողը չպետք է թելադրի, թե մենք որտեղ անենք, ինչ անենք, ինչի համար անենք»,- մեզ հետ զրույցում ասաց «Իմ քայլը» խմբակցության պատգամավոր Վարազդատ Կարապետյանը: Ըստ նրա՝ եթե մարդը նկարիչ է, պետք է կարողանա նորմալ ապրել, ոչ թե սովամահ լինել, ու մարդիկ պիտի սիրով աշխատեն, ոչ թե ստիպված. «Եթե իր գործը սիրի, դրանից հաճույք ստանա, մենք կունենանք երջանիկ հանրություն: Եթե մեծ ընկերություններն ասում են՝ հանքարդյունաբերություն ենք զարգացնում, ձեզ 300 հազար կտանք, եկեք աշխատեք ու բերաններդ փակեք՝ էս չի մեր նպատակը:
Էական չի՝ տնտեսական աճը 5 տոկոս կլինի, թե մինուս 10, որովհետեւ մեր նպատակը մարդու զարգացումն է»: Նա ասաց, որ կառավարության ծրագրում կարող էին տնտեսական աճը 20 տոկոս գրել. «Այդ դեպքում ի՞նչ էին անելու ընդդիմախոսները, 5 ենք գրել, ասում են՝ քիչ է, 20 գրեինք՝ շատ է»: Նրա խոսքով՝ 20 տոկոս կարող էին գրել, մեկ տարում մի 15 հատ ոսկու հանք բացել, մեծ ներդրումներ բերել, 2 տարվա ընթացքում աճ ունենալ, բայց 10 տարի հետո նորագոյացություններով աշխարհում առաջին տեղում կլինենք, դա՞ ենք ուզում:
ՀՌԻՓՍԻՄԵ ՋԵԲԵՋՅԱՆ
«Առավոտ» օրաթերթ,
15.02.2019
