Տարածքային կառավարման եւ զարգացման նախարար Սուրեն Պապիկյանը փետրվարի 13-ին Տավուշի մարզպետարանի դահլիճում մարզի համայնքների ղեկավարների, դպրոցների տնօրենների հետ հանդիպման ժամանակ հայտարարեց, որ արտերկրից Հայաստանում ներդնողներ կան, որոնց հեկտարներով հող է հարկավոր, սակայն ազատ հողեր չկան:
Նախարարը հավելեց.
«Հողը չենք կարողանում նրան առաջարկել, որովհետեւ հողն ունի սեփականատեր, եւ այդ սեփականատերն իր հերթին չկա, որպեսզի հասկանանք՝ ինքը պատրա՞ստ է արդյոք այն վաճառել կամ վարձակալությամբ տալ որեւէ մեկին, ինքը գտնվում է, օրինակ, Ռուսաստանի Դաշնությունում: Հիմա մեր համայնքապետերի համար շատ կարեւոր է խնդիր է գտնել յուրաքանչյուրին, կապ հաստատել տարբեր միջոցներով, ծանուցել, թե արդեն ինչքան ժամանակ է,որ հողն ըստ նշանակության չի օգտագործվում:
Ես վստահ եմ, որ ինչպես դա եղել է Հայաստանի մի քանի համայնքներում, մասնավորապես այդ հարցում վերջերս, խոշորացումից հետո, ակտիվ է Տաշիր համայնքը, երբ հարյուրավոր մարդիկ, պարզվել է, որ իրենք հրաժարվում են հողից, պարզապես նրանց հարցնել է պետք այդ մասին, ոչ թե նստել եւ մտորել, թե ինչպես հարկել այդ հողերը: Կարելի է հողը վարձակալությամբ տալ որեւէ մեկին եւ դրանով պակասեցնել ապառքների այն քանակը, որ կա: Ես խնդրում եմ այս հարցում հետեւողականություն ցուցաբերել»:
Ոսկան ՍԱՐԳՍՅԱՆ
