Կառավարության ծրագրի քննարկման ժամանակ ԱԺ-ում իր ամփոփիչ ելույթում վարչապետ Նիկոլ Փաշինյանը կոշտ քննադատեց «Լուսավոր Հայաստան» խմբակցությանը:
Մենք խմբակցության ղեկավար Էդմոն Մարուքյանին հարցրեցինք՝ այսքան քննադատությունից հետո հիմա «հանգիստ նստելու եք տեղնե՞րդ.,. ինչպես հայտնի հորդորում ասում էր վարչապետը՝ Մարուքյանը պատասխանեց. «Իսկ դուք նկատեցիք, որ մենք հանգիստ նստում ենք տեղնե՞րս, իսկ մեկդ տեսավ, որ մենք կարող է հանգիստ նստենք մեր տե՞ղը»:
Թե ի՞նչ եք անելու, եթե ոչ հանգիստ նստեն՝ Մարուքյանը պատասխանեց. «Ինչ անելու էինք՝ արեցինք, եղավ դեբատ: Մենք մեր առաջարկները շարունակելու ենք, պետք է սուպերվարչապետական համակարգը փոխվի, դա փայփայելու հավատամք կա այսօր»:
Փաշինյանն ասել էր՝ ասում են՝ հեղափոխություն չի եղել, բա եթե չի եղել, մի հատ նայեք կողքերդ, դուք 18 հոգով ի՞նչ գործ ունեիք էստեղ նստած: Մարուքյանը պատասխանեց. «18 մանդատը ՀՀ քաղաքացիների քվեարկության արդյունք է ու ոչ Նիկոլ Փաշինյանը, ոչ որեւէ մեկը չի կարող դա կասկածի տակ դնել, դրա հետ պետք է հաշվի նստել գիշեր-ցերեկ: Հեղափոխություն եղել է, դրա համար իրենք ունեն 88 մանդատ, հետեւաբար նման հարց, նման դեբատ չկա, ո՞վ է վիճարկում դա»:
Մարուքյանն ասաց, որ այսօր իրենք 18 մանդատ ունեն նաեւ այն պատճառով, որ հեղափոխությանը ինչ-որ չափով աջակցել են:
Փաշինյանը խոսել էր նաեւ 1in.am-ի խմբագրության մոտ դրված ԵՄ դրոշից: Մարուքյանն ասաց. «Կներեք, երբ Փաշինյանը գնում էր այնտեղ հարցազրույց տալիս, իրեն էդ դրոշները չէի՞ն խանգարում: Որ ինքը հարցազրույց էր, տալիս, որ իրեն 24 ժամ լուսաբանում էին, էդ լավ կանալ էր, հենց արդեն պետք չի, Վատիկանի դրոշի կանա՞լն ա, ձե՞ռ եք առնում, էս ի՞նչ ձեւեր են, չափ կա, սահման կա, պետք է ամեն մարդ իրան հաշիվ տա ինչ է խոսում»:
«Իմ քայլի» պատգամավոր Էդգար Առաքելյանն ասել էր, որ քննադատողները սգո սերվիս դեմքով են, Մարուքյանն արձագանքեց. «Էդ ասողին սեւ սգո սերվիս կարանք ցույց տանք, ուղղակի…»:
Հռիփսիմե ՋԵԲԵՋՅԱՆ
