«Հանուն սոցիալական արդարության» կուսակցության տասնյակ անդամներ Ազգային ժողովի շենքի առջև այսօր բողոքի ակցիա անցկացրին ի նշան այս Ամանորին կառավարության անդամների ստացած պարգեւավճարների: Ցուցարարները պահանջում են, որ ԱԺ-ն բացահայտի, թե որքան պարգևավճարներ են ստացել կառավարության անդամները և այլ պետական աշխատողներ:
Կուսակցության առաջնորդ Արման Ղուկասյանի խոսքով, «Պահանջագիր ենք այսօր փոխանցելու խորհրդարանի ղեկավար Արարատ Միրզոյանին: Ժողովրդավարական երկրներում խորհրդարանը պետք է օժտված լինի եւ ունենա վերահսկողության լծակներ: Խորհրդարանական կառավարման երկրներում խորհրդարանները նաեւ ունեն խորհրդարանական հետաքննության լծակներ, բայց մենք չենք տեսել այդ լծակների կիրառումն այստեղ: Հանրությունը մեծ դժգոհություն բարձրացրեց պարգեւավճարների հարցում, տեղեկատվություն կա, որ պարգեւավճարների թվերն այնքան բարձր էին, որ անթույլատրելի էր, քանի որ մեր երկրում որակական առումով կյանքի դրական տեղաշարժեր չեն եղել: Շատ անելիքներ դեռ կան, ծայրահեղ աղքատությունը դեռեւս հաղթահարված չէ, եւ այդ ֆոնին այդքան բարձր պարգեւավճարներ տալն անարդար է ազգի, սեփական ժողովրդի նկատմամբ: Պահանջում ենք, որ ԱԺ-ն թափանցիկ ձեւով բացահայտի այն թվերը, որոնք տրվել են չինովնիկներին, ներկայացվի 2019-ի պարգեւավճարների թիվը նախապես, որ տալուց հետո ժողովրդին փաստի առջեւ չկանգնեցնեն: Պահանջում ենք նաեւ, Ազգային ժողովը, եթե չունի խորհրդարանական հետաքննական լծակներ, ապա օրենսդրական մակարդակով նախաձեռնի ու ստեղծի»:
Անդրադառնալով պաշտոնյաների պարզաբանմանը, թե պարգեւավճար տալով՝ օրենք չի խախտվել, Արման Ղուկասյանն ասաց՝ բայց միգուցե պետք է խոսենք բարոյական օրենքներից, որովհետեւ հեղափոխությունից հետո պետք է պարտադիր խոսել այդ արժեքների՝ բարոյական օրենքների ու բարոյական արժեքների մասին:
Արփինե ՍԻՄՈՆՅԱՆ
Արման Ղուկասյանի լուսանկարը՝ ֆեյսբուքյան էջից
