«Թվերի հարցը շահարկվեց: Այո, թվեր էլ ենք ուզել, բայց թվերը չեն մեխը: Անընդհատ նախկին իշխանություններին հիշելով եւ թիրախավորելով՝ փորձում եք ծածկել այսօրվա խնդիրները»,-կառավարության ներկայացրած ծրագրի քննարկման ժամանակ այսօր ԱԺ ամբիոնից հայտարարեց «Լուսավոր Հայաստան» կուսակցության ղեկավար Էդմոն Մարուքյանը:
Նա այնուհետեւ դիմեց վարչապետ Նիկոլ Փաշինյանին. «Տնտեսական բլոկում հին իշխանության կադրերն են, որոնք չեն հավատում, որ կարելի է հինգ տոկոսից ավելի բարձր տնտեսական աճ ունենալ, դրա համար ասել են, որ դուք կառավարության ծրագրում գրեք հինգ թիվը: Սերժ Սարգսյանն էլ էր գրում հինգ…: Նրանք չունեն հեղափոխականների երազանքները: Դուք պետք է ազատվեք երկրորդ պլանի խաղացողներից, որոնք Սերժ Սարգսյանի ժամանակ փոխնախարարներ էին, օրինակ՝ տնտեսական զարգացման նախարարը, ֆինանսների նախարարը»:
Էդմոն Մարուքյանի խոսքով. «Նրանք չեն հավատում: Պարոն վարչապետ, չհավատալով՝ նրանք «տորմուզ» են լինելու ձեր բարեփոխումների համար: Անվտանգության ոլորտում կրկին Սերժ Սարգսյանի ժամանակվա երկրորդ պլանի գործիչներն են այսօր: 12-13 մարդու կենսագրականները երբ նայում ես, հասկանում ես, որ հեղափոխության մասնակիցները թվով զիջում են Սերժ Սարգսյանի ժամանակ երկրորդ պլանում եղած պաշտոնյաների թվին: Նրանք են ստիպել վարչապետին գրել, որ ակնկալվում է հինգ տոկոսանոց տնտեսական աճ»:
Պատգամավորը կարծում է, որ ամենաքննադատվածը Նիկոլ Փաշինյանի կադրային քաղաքականությունն է. «Այդ կադրերն ամենօրյա ռեժիմով ազդում են վարչապետի վարկանիշի վրա, նվազեցնում են այն, եւ այդ կադրերով հնարավոր չէ տնտեսական հեղափոխություն անել»:
Ապա Մարուքյանը հայտարարեց, որ իր խմբակցությունը «դեմ» է քվեարկելու կառավարության ծրագրին. «Միայն կառավարության կառուցվածքը բավարար է դրա համար: Մենք դեմ ենք նաեւ կադրային քաղաքականության համար: ԼՀԿ-ն վարչապետին առաջարկում է ազատվել Սերժ Սարգսյանի երկրորդ պլանի խաղացողներից»:
Լուիզա ՍՈՒՔԻԱՍՅԱՆ
