«Լուսավոր Հայաստան» կուսակցության պատգամավոր Կարեն Սիմոնյանն այսօր ԱԺ նիստում անդրադառնալով կառավարության ներկայացրած ծրագրին՝ նկատեց, որ ժողովրդագրական խնդիրները դուրս են մնացել դրանից: «Պարզ չէ՝ կառավարությունը գտնո՞ւմ է, որ առկա են ժողովրդագրական սպառնալիքներ եւ վտանգներ: Եթե դրանք կան, ապա ի՞նչ քայլեր են նախատեսվում»,-դիմելով դահլիճում նստած վարչապետ Նիկոլ Փաշինյանին՝ հարցադրումներ արեց Կարեն Սիմոնյանը: Նա շեշտեց, որ վերջին տասնամյակում որոշ վտանգներ, օրինակ՝ ծնելիության ցածր մակարդակը, արդեն սպառնալիքի կարգավիճակ ունեն:
«ՀՀ-ի համար ժողովրդագրական անվտանգությունը խնդիր է: Այսօր չփորձել դրան ուշադրություն դարձնել՝ անթույլատրելի է: Այսօր պաշտպանության ոլորտում արդեն իսկ երեւում են ժողովրդագրական խնդիրների հետեւանքները. չէ՞ որ այսօր ծնվողները հետո զինվոր են դառնալու: Ժողովրդագրական խնդիրները սպառնում են նաեւ տնտեսությանը: Բնակչությունը եւ սպառող է, եւ արտադրող, մինչդեռ տնտեսությունը որոշ ժամանակ հետո ինքնավերականգնման հնարավորություն չի ունենալու»,-համոզմունք հայտնեց Կարեն Սիմոնյանը:
Ըստ նրա՝ որոշ մասնագետներ գտնում են, որ երկու միլիոնանոց բնակչություն ունենալու դեպքում ՀՀ տնտեսությունը վերականգնվելու հնարավորություններ չի ունենա առաջիկա տարիներին: Ապա պատգամավորը կառավարության ղեկավարին առաջարկեց ընդհանուր ժողովրդագրական քաղաքականության եւ հայրենադարձության համակարգված ծրագիր ունենալ. «Իսրայելում, օրինակ, որոշեցին տարբեր երկրներում «Վերադարձի գրասենյակներ» բացել: Քանի՞ նման գրասենյակ կարող է ստեղծել ՀՀ-ն: Հասկանում եմ, որ կառավարությունը նախորդ ամիսներին չէր կարող այդ խնդրով զբաղվել, բայց առաջիկա տարիներին կարող է: Պարոն Փաշինյան, կոչ եմ անում կառավարության գործողությունների ծրագրում ներառել ժողովրդագրական ռազմավարության փաստաթուղթ»:
Հիշեցնենք, որ այսօր եւս պատգամավորները ելույթներ են ունենում կառավարության ներկայացրած ծրագրի շուրջ:
Լուիզա ՍՈՒՔԻԱՍՅԱՆ
