«Երկրի ոստիկանապետին ասում են «լակոտ», բայց որեւէ մեկդ չի պաշտպանում նրան, չի համարձակվում զորավիգ լինել: Երեկ էլ Պաշտպանության նախարարին էին «հաթաթա» տալիս, մինչեւ ե՞րբ…: Պետության կենսական ինստիտուտները չենք կարողանում միասնաբար պաշտպանել»,-ԱԺ ամբիոնից այսօր «Իմ քայլը» խմբակցության պատգամավորներին այսպիսի մեղադրանքներ հղեց «Լուսավոր Հայաստան»-ի պատգամավոր Արման Բաբաջանյանը: Հիշեցնենք, որ պատգամավորները մտքեր են փոխանակում կառավարության ներկայացրած ծրագրի մասին:
Արման Բաբաջանյանն այնուհետեւ քննադատեց ծրագրի՝ արտաքին քաղաքականությանն առնչվող հատվածը: Նրա տպավորությամբ՝ ՀՀ-ն չի փնտրելու նոր գործընկերներ եւ շարունակելու է ինքնամեկուսացված լինելու քաղաքականությունը: «Ռուսաստանը հանդես է գալիս որպես արտաքին քաղաքականության խոչընդոտ, մինչդեռ Ռուսաստանի հետ հնարավոր է եւ պետք է խորացնել հարաբերությունները, բայց մեկ պարտադիր պայմանով՝ դրանք պետք է հիմնված լինեն ՀՀ ինքնիշխանության հարգանքի վրա»,-համոզմունք հայտնեց Արման Բաբաջանյանը:
Ըստ նրա՝ կառավարության ծրագիրը կարծես արձանագրում է, որ ՀՀ անվտանգության երաշխավորը միայն բանակն ու զինվորն են, եւ անվտանգությունը կախված է զինվորի փամփուշտների քանակից. «Մինչդեռ զինվորը պետք է գիտակցի, որ իր թիկունքին կա դիվանագետ, որը եւս անվտանգության երաշխավոր է»:
Լուիզա ՍՈՒՔԻԱՍՅԱՆ
