ԱԺ «Բարգավաճ Հայաստան» խմբակցությունն առաջարկում է կառավարության ներկայացրած ծրագրում եւս մեկ՝ 9-րդ գլուխն ավելացնել, որում կամրագրվեն ծրագրի իրականացման երաշխիքներն ու գործիքակազմը: Այս մասին այսօր ԱԺ ամբիոնից հայտարարեց ԲՀԿ պատգամավոր Վահե Էնֆիաջյանը:
Հիշեցնենք, որ ԱԺ-ն քննարկում է կառավարության ծրագիրը:
Վահե Էնֆիաջյանի փոխանցմամբ՝ ԲՀԿ-ն առաջարկում է 9-րդ գլխում ամրագրել ծրագրի ռիսկերը եւս:
«Ծրագրում պետք է արձանագրել պետության կողմից ֆինանսավորվող դրամական միջոցների ծավալները, մինչեւ 2023թ.-ը ներգրավվելիք ներդրումների ընդհանուր ծավալը, այդ թվում՝ օտարերկրյա: Ծրագիրը պետք է սահմանի առաջիկա հինգ տարում հարկեր-ՀՆԱ աճը՝ ըստ տարիների, աշխատատեղերի քանակը՝ ըստ ոլորտների: Այն պետք է սահմանի նաեւ պետական պարտք-ՀՆԱ հարաբերակցությունն ըստ տարիների, ինչպես նաեւ՝ նվազագույն աշխատավարձի, գործազրկության եւ կենսաթոշակի աճը»:
ԲՀԿ-ն նաեւ ակնկալում է, որ Կառավարության ծրագիրը կհստակեցնի կրթության զարգացման պետական ծրագիր ունենալու հարցի շուրջ դիրքորոշումը: «Առաջարկում ենք նաեւ հստակ նշել ՀՀ-ի պարտականություններն ու գործողությունների հաջորդականությունը՝ ՀՀ-Սփյուռք հարաբերություններում»,-եզրափակեց Վահե Էնֆիաջյանը:
Լուիզա ՍՈՒՔԻԱՍՅԱՆ
