Այսօր Շիրակի նորանշանակ մարզպետ Տիգրան Պետրոսյանին պաշտոնապես ներկայացնելու եկած ՀՀ տարածքային կառավարման և զարգացման նախարար Սուրեն Պապիկյանը, խոսելով ներդրումներից, տեղեկացրեց, որ եվրոպական երկրներին թռչնամիս մատակարարող ուկրաինական մեծ ընկերությունը ուզում է մեր տարածաշրջան մուտք գործել ու Հայաստանում կատարել իր քայլը․ թռչնաբուծարան հիմնել։ Նախարարը չբացառեց, որ թռչնաբուծարանը կարող է հիմնվել հենց Շիրակի մարզում։
«Ճանապարհին ես խոսում էի իմ տեղակալի հետ, որպեսզի մարզպետների հետ կապ հաստատի, մեզ հարկավոր է 50 հեկտար հողատարածք, ուկրաինացի ներդրողի մասին է խոսքը։ Հողատարածքը մայրուղուն մոտ պետք է լինի, սովորաբար ներդրողը լավ ենթակառուցվածքների խնդիր է առաջ քաշում, մոտակա տարածքում ունենա ջրի հնարավորություն, թեկուզ դա կարող է լինել անգամ հորատման միջոցով, լույս և գազ։ Սրանց առկայության պայմաններում ներդրումը կարող է Հայաստանում կայանալ, մոտավորապես 1500 աշխատատեղի մասին է խոսքը։ Իհարկե, սա խիստ նախնական է, ես չեմ ուզում սա որպես խոստում հնչեցնել»,- ասաց Սուրեն Պապիկյանը։
Նունե ԱՐԵՎՇԱՏՅԱՆ
