Երեւանի ավագանու նախկին անդամ Սոնա Աղեկյանը պատրաստվում է դատարանում բողոքարկել իրեն բռնության ենթարկելու դեպքով հարուցված քրեական գործը կարճելու մասին քննիչի որոշումը:
Հիշեցնենք, որ ՀՀ Քննչական կոմիտեն կարճել է 2018 թ. փետրվարի 13-ին ավագանու նիստի ծեծկռտուքի փաստով հարուցված քրեական գործը՝ հանցակազմի բացակայության պատճառով։
«Համոզված եմ՝ հանրապետական ոհմակին հեղափոխված Հայաստանում չեն պատժելու, բայց ես դիմելու եմ դատարան, այդ փուլն էլ անցնեմ, որ հետագայում դիմեմ Մարդու իրավունքների եվրոպական դատարան: Եթե նախկինում բողոքում էինք, որ Հայաստանում արդարադատություն չկա, դատավորները կաշկանդված են իրենց որոշումները կայացնելիս, այս պարագայում չակերտավոր հեղափոխված Հայաստանում եւս արդարադատությունը գտնվում է հանրապետական ոհմակի վերահսկողության տակ»,- Aravot.am-ին ասաց Սոնա Աղեկյանը:
Արփինե ՍԻՄՈՆՅԱՆ
