«Երբ ասում ենք՝ վիճակը վատ է, ձեզ մի վերագրեք: Մենք նկատի ունենք, թե ինչ պետք է անել, ուստի մեր քննադատությունները մի անձնավորեք»,-ԱԺ-ում այսօր ՀՀ վարչապետի կողմից կառավարության ծրագրի ներկայացումից հետո նրան այս խոսքերով դիմեց ԲՀԿ պատգամավոր Գեւորգ Պետրոսյանը: «Մեր հարցերում ոչ հեգնանք փնտրեք, ոչ էլ հեգնանքով պատասխանեք մեր հարցերին: Այս դահլիճում չկա մեկը, որը կուզենար տեսնել կառավարության ձախողումը: Ձախողվում են այն իշխանությունները, որոնց համար ընդդիմության ձայնը լսելի չէ: Հիմա մի բան հաշվի առնելո՞ւ եք ընդդիմության ասածներից»,-հարցրեց Պետրոսյանը Նիկոլ Փաշինյանին:
Նա շարունակեց. «Ասում եք՝ «թող քաղաքացին տնտեսական հեղափոխություն անի»…բայց քաղաքացին արդեն արել է հեղափոխություն, սոված մարդը ո՞նց անի տնտեսական հեղափոխություն: Ասում եք, թե մարդն իր գլխում պետք է աղքատությունը հաղթահարի, բայց, կներեք, եթե ձեր քույրն ասի՝ «աղքատ եմ», էլի կասեք՝ «գնացեք ձեր գլխում հաղթահարե՞ք աղքատությունը»…Պետական վերահսկողության ծառայությունը պարտիզանական լռությամբ վերաբերվեց պարգեւատրումներին: Հիմա քաղաքացին գնա ասի՝ ՊՎԾ, ինչո՞ւ այդպես արեցիր: Քաղաքացին պարտադիր պետք է բողոքի՞, որ պետությունն իրենով զբաղվի»:
Գեւորգ Պետրոսյանը դժգոհեց նաեւ այն փաստից, որ Սփյուռքի նախարարությունը փոխարինվում է սփյուռքի հարցերով հանձնակատարով: «Ասում եք, թե Սփյուռքի նախարարությունը կրճատել եք, որովհետեւ կրկնվող գործառույթներ կային: Արտաքին հարաբերությունների վարչությունները կրճատեիք: Կախարդական փայտիկը երեւի սփյուռքի հարցերով ձեր հանձնակատարի գրպանում է լինելու, որպեսզի նա մի ամբողջ նախարարության գործառույթ իրականացնի»,-դիմելով վարչապետին՝ եզրափակեց պատգամավոր Գեւորգ Պետրոսյանը:
Լուիզա ՍՈՒՔԻԱՍՅԱՆ
