«Սասնա ծռերի» տասը անդամների գործով դատական նիստի ժամանակ այսօր Արայիկ Խանդոյանի այրու ներկայացուցիչ Արա Ղարագյոզյանը դատարանին միջնորդություն ներկայացրեց`վերանայել որոշումը նիստերը դռնփակ անցկացնելու վերաբերյալ:
Հիշեցնենք, այդ որոշումը կայացվել էր նախորդ նիստում:
Մեղադրող Պետրոս Պետրոսյանն ասաց` նիստերը դռնփակ անցկացնելու վերաբերյալ դատարանի որոշումը իրավաչափ է, նիստի հրապարակայնությունը ապահովված է` նիստերը լուսաբանվում են: Մեղադրողն առարկություններ չուներ նիստերը դռնբաց շարունակելու առումով, սակայն քաղաքացիները պետք է հասկանան, որ սա դատական նիստ է եւ իրենց գոչյուններով իրենք արդարադատությանն են խոչընդոտում:
Նախագահող դատավոր Մեսրոպ Մակյանը բավարարեց միջնորդությունը`հորդորելով ավելի զուսպ լինել դահլիճում:
Իսկ ոստիկանները, մինչ նիստի մեկնարկը, դատարանի շենքի մոտ պատնեշ էի դրել:
Նելլի ԳՐԻԳՈՐՅԱՆ
