Ռուս բլոգեր Ալեքսանդր Լապշինը Facebook-ի իր էջում հայտնել է, որ չի կարողացել Անիի համայնապատկերը դիտել հայկական կողմից՝ բյուրոկրատական քաշքշուկների և հայ ու ռուս սահմանապահների միջև անհամաձայնությունների պատճառով:
«Այսօր շրջում է Հայաստանի և Թուրքիայի սահմանի երկայնքով՝ հույս ունենալով այցելել հնագույն Անի քաղաքի դիտահարթակ: Չեմ ուզում այս մասին գրել, բայց բյուրոկրատիայի և հայ ու ռուս սահմանապահների միջև անհամաձայնության պատճառով (ինչպես հայտնի է, Հայաստանի սահմանը Թուրքիայի և Իրանի հետ պաշտպանում են ՌԴ Անվտանգության դաշնային ծառայության սահմանապահ զորքերը) մենք չտեսանք հայկական հնագույն մայրաքաղաքը: Հայկական կողմը մեզ ուղարկում էր թույլտվություն վերցնելու ռուսներից, իսկ ռուսներն ուղարկում էին հայերի մոտ: Քաշքշուկը շարունակվեց մոտ երեք շաբաթ: Որպես բոնուս՝ տեսանք՝ ինչպես են ապրում սահմանամերձ գյուղերը, և այդ մասին կլինի առանձին ռեպորտաժ:
Ընդհանուր առմամբ, բանակային անիմաստ բյուրոկրատիայի պատճառով Հայաստանը կորցնում է կարևոր զբոսաշրջային օբյեկտ՝ սեփական հնագույն մայրաքաղաքի համայնապատկերը, որը գտնվում է Թուրքիայում, բայց հայկական կողմից ընդամենը 300 մետր հեռավորության վրա է: Խնդիրն այն է, որ հին, դեռ խորհրդային սահմանային ցանկապատը գտնվում է իրական սահմանից 3-4 կմ-ի վրա, և այնտեղ է գտնվում անցակետը: Դրանից այն կողմ ոչ մեկի չեն թողնում: Մինչդեռ կարող էին հարյուրավոր զբոսաշրջիկներ տանել ավտոբուսներով՝ հնարավորություն տալով ծայրահեղ աղքատության մեջ ապրող տեղի բնակիչներին գումար վաստակել:
Բարեբախտաբար, հարևան Թուրքիայում իշխանությունները չեն խոչընդոտում Անի այցելություններին: Այնտեղ դուք կարող եք զբոսնել Անիում որքան ցանկանաք, չնայած սահմանն անցնում է հնագույն տաճարներից հաշված մետրերի հեռավորության վրա»,- գրել է Լապշինը:
Պատրաստեց՝ Վիկտորյա ԱՆԴՐԵԱՍՅԱՆԸ
