Տավուշի մարզի հանրակրթական դպրոցների աշխատողները դեռեւս չեն ստացել հունվար ամսվա աշխատավարձը: Դպրոցների աշխատողները նախորդ ամսվա աշխատավարձը սովորաբար ստանում են մինչեւ հաջորդ ամսվա 4-ը:
Աշխատավարձի ուշացումը շատ ուսուցիչների անհանգստացրել է, որովհետեւ նրանցից շատերը բանկերում վարկային պարտավորություններ ունեն, որոնց մարելու համար հերթական մուծում կատարելու ժամկետն է:
Հեռախոսազրույց ունեցանք Տավուշի մարզպետարանի աշխատակազմի կրթության, մշակույթի եւ սպորտի վարչության պետի պաշտոնակատար Մանե Ղազումյանի հետ: Նա հայտնեց, որ ամեն տարվա սկզբին դպրոցների աշխատավարձի վճարման որոշ ուշացում է եղել: Նաեւ ասաց, որ ֆինանսների ու կրթության եւ գիտության նախարարության միջեւ հարաբերություններում հաշվապահական նոր համակարգեր են ներդրվում, որը եւս աշխատավարձերի վճարման ուշացման պատճառ է:
Տավուշի մարզի ուսուցիչները հայտնեցին, որ օրենքի համաձայն աշխատավարձի վճարումը մինչեւ հաջորդ ամսվա 15-ն է կատարվում, սակայն վարկային պարտավորությունները ժամկետում չկատարելու պատճառով իրենք դժվարին իրավիճակում են հայտնվել:
Ոսկան ՍԱՐԳՍՅԱՆ
Պարգևավճարները այնքան մեծ էին, որ հնարավորություն չթողեց, որ ուսուցիչները ժամանակին աշխատավարձ ստանային: