ՀՀ կառավարությունը մտադիր է հիմնել հայկական ներդրումային հիմնադրամ, որի գրասենյակը կհամակարգի ներդրողների աշխատանքները եւ լուծումներ կտա դրանց հետ կապված հնարավոր խնդիրներին: Այս մասին այսօր ԱԺ-ում Կառավարության ծրագրի ներկայացման հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը: «Ով ուզում է ներդրում անել, ասում է, որ պետք է վարչապետի կամ այլ բարձրաստիճան պաշտոնյայի հետ հանդիպի, ուստի լինելով այդ հիմնադրամի գրասենյակում՝ կարող ենք ասել, որ նա արդեն եղել է վարչապետի մոտ: Գրասենյակը կսպասարկի ներդրողին՝ ներդրումներ անելու ճանապարհին»,-տեղեկացրեց Նիկոլ Փաշինյանը:
Նրա բնորոշմամբ՝ այդ գրասենյակը կլինի մեկ վայր, որտեղ «մեկ պատուհանի» սկզբունքով ներդրողը կսպասարկվի՝ անկախ նրանից, թե ինչ խնդրի է բախվել. «Ներդրողի համար մեկ հասցե պետք է լինի, որին նա կդիմի բոլոր հարցերով, այդ թվում՝ իրավական»:
Ինչ վերաբերում է ներդրումային միջավայրին առհասարակ, Նիկոլ Փաշինյանը նկատեց, որ ոմանք 2018թ.-ին ՀՀ-ում իրականացված ներդրումներին «ապոկալիպտիկ» գնահատականներ են տալիս՝ ասելով, թե ներդրումների անկում է գրանցվել. «Այդ թվականը մի ժամանակաշրջան էր, երբ ՀՀ վարչապետի երեք հրաժարական է տեղի ունեցել, ԱԺ ընտրություններ են եղել: Այդ ֆոնին՝ անորոշությունների շրջանում, հետեւություններ են անում ներդրումային միջավայրի վերաբերյա՞լ»:
Լուիզա ՍՈՒՔԻԱՍՅԱՆ
