«Կենդանի պահելու մշակույթի բացակայությունը նույնպես նպաստում է թվաքանակի ավելացմանը»,-այսօր Երեւանի ավագանու նիստում ներկայացնելով մայրաքաղաքում թափառող կենդանիների հետ կապված իրավիճակը՝ ասաց Երեւանի քաղաքապետարանի բնապահպանության վարչության պետի ժամանակավոր պաշտոնակատար Խաչիկ Հակոբյանը՝ նշելով, որ թափառող շների տեսակն ավելացել է եւ դարձել ավելի ագրեսիվ:
Նրա խոսքով, այս խնդիրը լուծելու երեք տարբերակ կա. մեկը՝ ոչնչացնել էգ շներին, ինչը, պարոն Հակոբյանի համոզմամբ, համարվում է անհնարին եւ անթույլատրելի, մյուս տարբերակն այն կլինի, որ կենդանիների համար սննդի աղբյուրներ հանդիսացող վայրերը վերացնեն, ինչը իրատեսական չէ եւ երրորդ տարբերակը՝ որսալ, ամլացնել եւ վերադարձնել նույն միջավայր, ինչն, ըստ մասնագետների ամենաարդյունավետ միջոցն է:
Այսօր ավագանին հաստատեց «Թափառող կենդանիների վնասազերծման կենտրոն»-ի կանոնադրությունը եւ որոշում կայացրեց ստեղծել «Համայնքային ոչ առեւտրային կազմակերպություն»:
Պարոն Հակոբյանն ասաց, որ ծրագիրը մշակվել է քաղաքապետարանի կողմից ՀԿ-ների հետ համատեղ: Հարցի առնչությամբ, ԲՀԿ խմբակցության ավագանու անդամ Հռիփսիմե Առաքելյանն ասաց, որ այս ընթացքում պետք է վերահսկողությունն ուժեղացնել, որպեսզի տուժողներ չլինեն: Նա մատնանշեց հատկապես դպրոցների ու մանկապարտեզների տարածքները, որտեղ շատ երեխաներ են լինում:
Լուսինե ԲՈՒԴԱՂՅԱՆ
Մեղք են շները, մի սպանեք նրանց, խնդրում եմ ոչ միայն ես, այլև շատ ու շատ մարդիկ։ Կան բազմաթիվ միջոցներ նրանց քանակը կարգավորելու և ուրախ կյանք ապահովելու համար։ Լավ կլիներ, որ Ստամբուլի օրինակով Երևանում և մյուս քաղաքների փողոցներում նույնպես տեղադրվեին անտուն փիսոների և շների համար տնակներ և կեր։ Երկիր-մոլորակը մենակ մարդկանց համար չէ ստեղծված, երբ հասկանանք սա և դադարենք վերևից նայել բնությանը, գուցե մեր սեփական կյանքն էլ շատ ավելի լավ որակ կստանա։ Իսկ ով ձեռք է բարձրացնում անպաշտպան կենդանու վրա, թող իր կյանքում ստանա կենդանուն պատճառած տառապանքի հարյուրապատիկ չափը։