«Լուսավոր Հայաստան» խմբակցության ղեկավար Էդմոն Մարուքյանն օրենսդրական նախաձեռնությամբ էր հանդես եկել ԲՀԿ պատգամավոր Նաիրա Զոհրաբյանի հետ՝ առաջարկելով, որ դատապարտյալների 1 օրը հաշվարկվի 1,5 օր: Նախկին գումարման ԱԺ-ում այս նախագիծը նորից դրվել էր շրջանառության մեջ, բայց ԱԺ-ում տապալվել էր: Այսօր ԱԺ շենքի մոտ ի պաշտպանություն դատապարտյալների բողոքի ցույց էին անում մի խումբ քաղաքացիներ:
Ցուցարարներին հանդիպեց Էդմոն Մարուքյանը, հետո՝ ԲՀԿ պատգամավոր Նաիրա Զոհրաբյանը:
Էդմոն Մարուքյանն ասաց, որ իրենք խոսք էին տվել, որ նախագիծը նորից կներկայացնեն, ինչն արել են. «Այն ժամանակ կառավարության հիմնական փաստարկն այն էր, որ բանտերում հիմա չկա գերբեռնվածություն, բանտերում հիմա հերթով չեն քնում, դրա համար սա սխալ նախագիծ է: Ես լրամշակեցի նախագիծը ու դրեցի միայն հետադարձ ուժով, որ միայն ազդի նախկինում հերթով քնողների վրա, նախկինում տառապած մարդկանց վրա, այսինքն, պետությունը իր մարդասիրական մոտեցումը ցուցաբերի: Նախագիծը նաեւ մերժվեց այս կառավարության կողմից: Այն դեռեւս պետք է գա ԱԺ պետաիրավական հանձնաժողով ու պետք է դեռեւս քննարկվի: Բայց երբ կառավարությունը տալիս է բացասական եզրակացություն, քաղաքական մեծամասնությունը դեմ է լինում արդեն, հետեւաբար ձեր պահանջն ուղղեք իշխանությանը»:
Ցուցարարներից մեկն ասաց՝ հարյուրավոր դատապարտյալներ պատրաստվում են հացադուլ հայտարարել: «Իրենք պատրա՞ստ են էսօր դրան», – ասաց նա՝ խոսքն ուղղելով իշխանավորներին: Մարուքյանը հորդորեց իշխանական պատգամավորների մոտ լոբբինգ անել, որ նախագիծն անցնի. «Մենք 18 ձայն ունենք ԱԺ-ում, 18 ձայնով կողմ ենք»:
Ցուցարար կանանցից մեկն ասաց. «Պարո՛ն Մարուքյան, մենք ընտրել ենք թե՛ Նիկոլին, թե՛ ձեզ, մեզ էլ դուք օգնեք»: Մարուքյանն արձագանքեց. «Լավ եք արել, մենք էլ մեր խոստումը կատարել ենք»: Նա հորդորեց հացադուլ չանել, հացադուլը լավ տարբերակ չէ. «Դա միջոց չի որեւէ իրավունքի համար պայքարելու համար»:
Ցուցարարներից մեկն էլ հիշեցրեց՝ ախր այս կառավարության անդամները նախորդ կառավարության ժամանակ կողմ էին այդ նախագծին, ընդամենը 3-4 «դեմ»-ով չանցավ. «Հիմա իրենք դառան կառավարություն, արդեն չե՞ն ընդունում էդ, հե՞տ են կանգնում իրենց խոստումներից»:
Նա ասաց, որ դեռ հնարավորություն կա օրենքը անցկացնելու:
Ավելի ուշ Նաիրա Զոհրաբյանը հանդիպեց ցուցարարների հետ: Նա լրագրողների հետ զրույցում ասաց. «Կառավարության պատասխանն անհիմն էր, կներեք, բայց լոլոներ էր: Եվ ես, և ԼՀԿ-ից Էդմոն Մարուքյանը ներկայացրել էինք նախագիծ, որպեսզի մեկ օրը մեկ ու կես օր հաշվվի, ես նույնիսկ առաջարկել էի, որ հետհաշվարկ գնար 2003-2004 թթ.-ից, որը հնարավորություն կտար, որ մի շարք մարդիկ ազատության մեջ լինեին։ Բայց երեկ չէ առաջին օրը մեր նախագիծը մերժվել է»:
Հռիփսիմե ՋԵԲԵՋՅԱՆ
