«Ինչ սեփականություն ունեմ, բաց ու պարզ է, ասել եմ՝ նկարեք, ժողովրդին ցույց տվեք». Սասուն Միքայելյանը՝ իր ու Մանվել Գրիգորյանի զուգահեռների մասին

ՔՊ վարչության նախագահ Սասուն Միքայելյանն առաջադրվում է՝ որպես ԵԿՄ նախագահ: Այսօր ԱԺ-ում լրագրողների հետ զրույցում Սասուն Միքայելյանն ասաց, որ երեւի 91-ից հետո այդքան մարդ չէր հավաքվել ԵԿՄ-ում, ինչքան այսօր: Թե ի՞նչն է փոխելու ԵԿՄ-ում, նա վստահեցրեց, որ 90 տոկոսը փոփոխման ենթակա է. «Ազատամարտը ազատագրել է 10400 քմ կմ տարածք ու այդ ժամանակամիջոցում զոհվել է 6007 մարդ: Դա փառքի արժանի գործունեություն է, որը ծավալել են ազատամարտիկները: Մենք պետք է կարողանանք նորմալ այդ արժեքների կորուստը, որ ճիշտ չի ներկայացվել ժողովրդին, ներկայացնեն մեր ժողովրդին: Ճիշտ չի մատուցվել մեր ժողովրդին»:

Հարցին՝ դուք կուսակցության ղեկավար եք, եթե ԵԿՄ նախագահ եք դառնում, չի՞ ստացվում, որ եթե դառնաք ԵԿՄ նախագահ, այդ կառույցը կրկնի քաղաքականացվում է, ինչպես Մանվել Գրիգորյանի ժամանակ՝ նա պատասխանեց, որ շուտով ՔՊ-ի համագումարը կլինի ու ինքն այլեւս չի լինի կուսակցության վարչության նախագահ: Ինչ մնում է ԵԿՄ-ն քաղաքականացնելուն՝ Սասուն Միքայելյանն ասաց. «Ոչ, նման բան չի կարող լինել իմ դեպքում, պարզ ասում եմ: Արդեն մեր ժողովուրդն առնչվել է էդ հարցին, անուններ չեմ ուզում տամ: ԵԿՄ-ն եղել է կյանքի գնով ժողովրդի ծոցից ծնված կազմակերպություն»:

Հարցին՝ եթե Նիկոլ Փաշինյանի իշխանությանը ինչ-որ բան սպառնա, Նիկոլ Փաշինյանը չի՞ կանգնի նրա կողքին՝ Սասուն Միքայելյանը պատասխանեց. «Ոչ, երբե՛ք ԵԿՄ-ն նման բան չի անի: Նման բան չկա: ԵԿՄ-ն երբեք չի խանգարի այսօրվա կառավարությանը, տարբեր հարթության վրա նայեք կամավորականների միություն ու կառավարություն: ԵԿՄ-ն չի կարող դառնալ իշխանության զավակ»:

Լրագրողների դիտարկմանը, որ զուգահեռներ են տարվում Մանվել Գրիգորյանի ու ձեր միջեւ՝ Սասուն Միքայելյանը պատասխանեց, որ ինչ սեփականություն ունի, բաց ու պարզ է. «Ասել եմ՝ նկարեք, ժողովրդին ցույց տվեք: Զուգահեռներ մի տարի հետո տարեք, երբ ես լինեմ ԵԿՄ նախագահ: Ու իմ գործունեությունը երբեք ուրիշի հետ չհամեմատեք»: Ըստ Միքայելյանի, ամեն մարդ քնից արթնանում է, ֆեյսբուքյան էջում իր կարծիքն է հայտնում, ժամանակը ամեն ինչ իր տեղը կգցի. «Մարդիկ չեն հավատում, որ ԵԿՄ-ն մեծ փոփոխություն կբերի ու թավշյա հեղափոխությունը բոլոր մյուս շերտերի վրա կազդի: Եթե ես դառնամ ԵԿՄ նախագահ, մի տարի հետ էս հարցերը չեն առաջանա»:

Հռիփսիմե ՋԵԲԵՋՅԱՆ

Մանրամասները՝ քիչ անց տեսանյութում